O‘zbekiston Prezident Shavkat Mirziyoyev 16-iyul, payshanba kuni videoaloqa orqali neft-gaz kimyosi, elektr texnikasi va farmatsevtika sanoatidagi yangi loyihalar taqdimoti hamda ushbu tarmoqlarni rivojlantirish ishlari bo‘yicha hisobotlar bilan tanishdi. Bu haqda Prezident matbuot xizmati xabar berdi.
Yig‘ilishda farmatsevtika va elektr texnikasi sanoatining rivojlanish holati, yuqori qo‘shilgan qiymatga ega sifatli mahsulotlar ishlab chiqarishni tashkil etish, ushbu tarmoqlar eksport salohiyatini kengaytirishga qaratilgan investitsiya loyihalarining borishi ham ko‘rib chiqildi.
Ma’lum qilinishicha, mamlakatda elektr texnikasi sanoatida 429 korxona mavjud bo‘lib, ularda 70 dan ortiq turdagi mahsulotlar ishlab chiqarilmoqda. O‘tgan yil yakunlariga ko‘ra, tarmoqda 897,5 million dollarlik mahsulot ishlab chiqarilgan, 250,3 million dollarlik mahsulot eksport qilingan.
Farmatsevtika sanoatida 202 ta korxona faoliyat yuritmoqda. 2019-yil yakunida bu tarmoqda ishlab chiqarish hajmi 170 million dollarni, eksport 22,1 million dollarni tashkil etgan. Ushbu ikki tarmoqda 52 mingdan ortiq kishi ish bilan ta’minlangan.
Ta’kidlanishicha, farmatsevtika korxonalarining aksariyati oddiy formulali dori-darmonlarni ishlab chiqarish bilan cheklanmoqda. Shu bois import qilinadigan mahsulotlar ulushi 79 foizni tashkil etadi. Ayni paytda farmatsevtika sanoatida umumiy qiymati 630 million dollar bo‘lgan 93 ta investitsiya loyihasi amalga oshirilmoqda, shundan 355 million dollari xorijiy investitsiyalardir. Ushbu loyihalarni amalga oshirish 5,5 ming ish o‘rni yaratilishini ta’minlaydi.
Yig‘ilishda tegishli tarmoq, vazirlik va idoralar rahbarlarining hisobotlari eshitildi. Davlat rahbari farmatsevtika va elektr texnikasi sanoatini rivojlantirish, ularning iqtisodiyotdagi ulushini oshirish, shuningdek, koronavirus pandemiyasi sharoitida barqaror ishlashini ta’minlash bo‘yicha aniq vazifalarni qo‘ydi.
Ilmiy rivojlanishga xorijiy investitsiyalarni keng jalb qilish, yangi ishlab chiqarishlarni tashkil etishni rag‘batlantirish, shu jumladan, qo‘shimcha erkin iqtisodiy zonalar va ilg‘or rivojlanish hududlarini yaratish, ushbu sohalardagi korxonalar o‘rtasida kooperatsiyani chuqurlashtirish, mahsulot tannarxini pasaytirish va uning raqobatdoshligini oshirish, mahalliy mahsulotlarning tashqi bozorga eksportini ko‘paytirish, shuningdek, elektrotexnika va farmatsevtika sohasidagi kadrlar salohiyatini kuchaytirish bo‘yicha topshiriqlar berildi.
Eslatib o‘tamiz, Shavkat Mirziyoyevning videokonferensaloqa orqali ishtirokida 2020-yilning 17-aprel kuni Toshkent viloyatining Zangiota tumanida Tashkent Pharma Park innovatsion ilmiy-ishlab chiqarish farmatsevtika klasteri qurilishi boshlangandi.
Pezident 14-iyul kuni bo‘lib o‘tgan videoselektorda viloyatlar rahbarlariga, 15-iyul kundagi yig‘ilishda esa Toshkent shahar hokimligiga uch oyga yetadigan dori zaxirasini shakllantirish bo‘yicha topshiriq berdi.
Izoh (0)