Rospotrebnadzor Rossiyaning birinchi bosqichda 13 ta mamlakat bilan aviqatnovlarni tiklashni taklif etmoqda. “RBK”ning xabar berishicha, bu haqda tashkilot rahbari Mixail Orlovning mamlakat Transport vazirligi va Rosaviatsiyaga 8-iyul kuni yo‘llagan maktubida qayd etilgan.
Ro‘yxatda Yevropaning 9 ta (Germaniya, Italiya, Buyuk Britaniya, Polsha, Daniya, Finlyandiya, Vengriya, Niderlandiya, Norvegiya) va Osiyoning 4 ta davlati (Xitoy, Shri-Lanka, Vyetnam, Mo‘g‘uliston) o‘rin olgan bo‘lib, Markaziy Osiyoda birorta davlat, xususan, O‘zbekiston yo‘q.
Maktubda parvozlar tiklanishi vaqti aytilmagan.
Shu bilan birga, “RBK”ning yozishicha, ushbu 13 ta mamlakat bilan aviqatnovlar tiklanishi haqida hali qaror chiqmagan. Bu hozircha Rospotrebnadzorning taklifi xolos. “Bu takliflardan biridir, ko‘p bora muhokama qilindi. Yakuniy qaror, menimcha hozirgisidan keskin farq qilishi mumkin”, — degan bu borada idoralararo muhokamadan xabardor bo‘lgan “RBK” manbalaridan biri.
Avvalroq Rossiya 15-iyuldan boshlab xalqaro aviaqatnovlarni qisman tiklashni rejalashtirayotgani, mamlakatga davolanishga va yaqin qarindoshlarini parvarishlashga boradigan xorijliklarga chegaralarini ochishi hamda ishlashga, o‘qishga, davolanishga va yaqin qarindoshlarini parvarishlash uchun mamlakatdan chiqib ketmoqchi bo‘lgan fuqarolarga ruxsat berishi haqida xabar berilgandi.
Izoh (0)