Janubiy Koreya poytaxti Seul shahri meri Pak Von Sun 9-iyul, payshanba kuni bedarak yo‘qoldi. Shahar politsiyasi shahar merini izlash ishlarini olib bormoqda. Bu haqda Reuters xabar berdi.
“RIA Novosti”ning yozishicha, shahar meri uning qizi tomonidan politsiyaga mahalliy vaqt bilan soat 17:17 da berilgan arizadan keyin bedarak yo‘qolgan deb e’lon qilingan. Merning qizi tomonidan ma’lum qilinishicha, uning otasi uydan 4-5 soat oldin chiqib ketgan va vasiyatnomaga o‘xshash xabar qoldirgan, uning telefoni esa ayni paytda o‘chirilgan.
Politsiya Seul shimolidagi Sonbuk-gu tumanida qidiruv operatsiyasini olib bormoqda, shahar merining telefonidan so‘nggi marta ana shu hududdan signal olingan. Politsiya dronlar va politsiya itlari yordamida keng qamrovli qidiruvni boshlagan.
Shahar ma’muriyatining xabar berishicha, merning soat 16:40 da bo‘lib o‘tishi rejalashtirilgan uchrashuvi “shoshilinch vaziyat” sababli bekor qilingan. Shuningdek, Pak Von Sun 9-iyul kuni o‘zini yomon his qilgani sababli ishga chiqmagani ma’lum qilingan.
Xitoyning CGTN nashri Pak Von Sunning vafot etgani haqida xabar bergan. Biroq Janubiy Koreya politsiyasi merning o‘lik holda topilgani haqidagi xabarni rad etgan.
Pak Von Sun Seul meri sifatida 2011-yildan buyon faoliyat olib bormoqda. U 2022-yilda bo‘lib o‘tadigan prezidentlik saylovida liberallar partiyasidan asosiy nomzod hisoblanadi.
Izoh (0)