Ichida 4 mingdan ortiq Hyundai va Kia avtomobillari bo‘lgan MV Golden Ray suv kemasi AQSh qirg‘oqlari yaqinida ag‘darilib ketgan edi. Hozirda mazkur kemani arralar yordamida bo‘laklarga bo‘lib, qirg‘oqqa olib chiqish rejalashtirilmoqda, deb xabar beradi The Maritime Executive.
Janubiy Koreyaning Hyundai Mipo Dockyard kompaniyasi tomonidan yaratilgan MV Golden Ray yuk kemasi 2019-yilning 8-sentabridan buyon Jorjiya shtatidagi Bransuik porti yaqinida yotibdi. Kema orqali bir necha ming Hyundai va Kia avtomobillari Baltimorga tashilayotgan bo‘lgan, biroq noma’lum sabablarga ko‘ra, kema portdan chiqqanidan 23 daqiqa o‘tib ag‘darilib ketgan. Ayrim ma’lumotlarga ko‘ra, bu yukning noto‘g‘ri joylashtirilishi sabab yuzaga kelgan. Hyundai versiyasi bo‘yicha esa kemada yong‘in sodir bo‘lgan.
Ko‘ngilsiz hodisadan keyin ekologik tashkilotlar kema ichidagi mashinalarning yoqilg‘isi va antifrizi suvga to‘kilgani va yaqin atrofdagi daryolarga qadar oqib borganini ma’lum qilgan. 2019-yilning oktabrida Golden Ray qayta tiklashga yaroqsiz deb topilgan. Kema har biri 4000 tonnaga teng sakkiz bo‘lakka arralanib, barjalarda (yassi yuk kemasi) tashib ketiladi.
Utilizatsiya bilan shug‘ullanuvchi Gallagher Merine kompaniyasi ulkan zanjirli arralardan foydalanish niyatida. Bu esa jiddiy yong‘inni yuzaga keltirishi mumkin, chunki kemaning yoqilg‘i baki deyarli to‘la. Yuk kemasi bilan birga uning ichida bo‘lgan barcha narsalar, jumladan, mashinalar ham arralanadi.
Izoh (0)