Kanadadagi Bring a trailer auksionida uch g‘ildirakka ega bir o‘rindiqli Peel P50 modeli sotuvga qo‘yildi. 1964-yilda ishlab chiqarilgan model uchun 30 ming dollar so‘ralmoqda. Mashina dunyodagi eng kichkina seriyali avtomobil hisoblanadi, deb xabar beradi “Bringatrailer.com”.
Sotuvga qo‘yilgan nusxa Britaniyaning Peel Engineering kompaniyasi tomonidan 1962—1965-yillarda yaratilgan shu turdagi 50 ta uch g‘ildirakli avtomobillardan biri hisoblanadi. Modelning uzunligi 1372 millimetrni, eni esa 991 millimetrni tashkil etadi. Bir o‘rindiqli mashinaning og‘irligi 59 kilogrammga teng. 2010-yilda model dunyodagi eng kichkina seriyali avtomobil sifatida Ginnesning rekordlar kitobidan joy olgan.
Auksionga qo‘yilgan Peel P50 modeli 1964-yilda Buyuk Britaniyadagi konveyerdan chiqqan. Shundan so‘ng u Kanadaga kelib qolgan va restavratsiya qilinib, ideal holatga keltirilgan. Avtomobil kuzovi shisha tola yordamida qayta tiklangan, salondagi yagona o‘rindiq oq charm bilan qoplangan.
Mazkur avtomobilga 4,2 ot kuchiga ega 49 kubli mototsikl dvigateli o‘rnatilgan bo‘lib, u uch pog‘onali mexanik uzatmalar qutisi yordamida boshqariladi. Peel P50’ning maksimal tezligi soatiga 60 kilometrga teng.
Peel P50’ning odometri yo‘qligi sabab 56 yoshli model hozirga qadar qancha yo‘l bosgani noma’lum. Dunyodagi eng kichkina seriyali avtomobil 30 ming dollar evaziga sotuvga qo‘yilgan bo‘lib, auksion yana 6 kun davom etadi.
Iyun oylarining boshlarida Germaniyada ham Peel P50 sotuvga qo‘yilib, u 150 ming yevroga baholangan edi.
Izoh (0)