Ичида 4 мингдан ортиқ Hyundai ва Kia автомобиллари бўлган MV Golden Ray сув кемаси АҚШ қирғоқлари яқинида ағдарилиб кетган эди. Ҳозирда мазкур кемани арралар ёрдамида бўлакларга бўлиб, қирғоққа олиб чиқиш режалаштирилмоқда, деб хабар беради The Maritime Executive.
Жанубий Кореянинг Hyundai Mipo Dockyard компанияси томонидан яратилган MV Golden Ray юк кемаси 2019 йилнинг 8 сентябридан буён Жоржия штатидаги Брансуик порти яқинида ётибди. Кема орқали бир неча минг Hyundai ва Kia автомобиллари Балтиморга ташилаётган бўлган, бироқ номаълум сабабларга кўра, кема портдан чиққанидан 23 дақиқа ўтиб ағдарилиб кетган. Айрим маълумотларга кўра, бу юкнинг нотўғри жойлаштирилиши сабаб юзага келган. Hyundai версияси бўйича эса кемада ёнғин содир бўлган.
Кўнгилсиз ҳодисадан кейин экологик ташкилотлар кема ичидаги машиналарнинг ёқилғиси ва антифризи сувга тўкилгани ва яқин атрофдаги дарёларга қадар оқиб борганини маълум қилган. 2019 йилнинг октябрида Golden Ray қайта тиклашга яроқсиз деб топилган. Кема ҳар бири 4000 тоннага тенг саккиз бўлакка арраланиб, баржаларда (ясси юк кемаси) ташиб кетилади.
Утилизация билан шуғулланувчи Gallagher Merine компанияси улкан занжирли арралардан фойдаланиш ниятида. Бу эса жиддий ёнғинни юзага келтириши мумкин, чунки кеманинг ёқилғи баки деярли тўла. Юк кемаси билан бирга унинг ичида бўлган барча нарсалар, жумладан, машиналар ҳам арраланади.
Изоҳ (0)