Oliy sud Bo‘stonliqdagi “snos”lar bo‘yicha uyushtirilgan press-turda sudyalarning qatnashganiga izoh berdi

Toshkent viloyatining Bo‘stonliq tumaniga noqonuniy qurilgan obyektlarning buzilishi masalasida uyushtirilgan press-turda Oliy sud rahbariyati ishtirok etgandi va bu ijtimoiy tarmoqlarda qizg‘in muhokamalarga sabab bo‘lmoqda.

Xususan, Telegram’dagi “davletovuz” kanali: “Bugun Toshkent viloyatining Bo‘stonliq tumanida noqonuniy dala hovlilarning buzilishi bo‘yicha press-tur tashkillashtirilibdi. Press-turda Oliy sud raisi o‘rinbosari Xolmo‘min Yodgorov hududda olib borilayotgan ‘snos’ ishlari bo‘yicha izoh bergan va albatta, ‘snos’larning o‘rinli ekanligini qayd etgan.

Oliy sud rahbariyatining bunday tadbirlarda ishtirok etishi, nazarimizda, sudlarning obro‘siga, mustaqillik prinsiplariga to‘g‘ri kelmaydi. Shu joyga borganining o‘ziyoq va bunday intervyu bergani, ayniqsa, uning mazmuni kelajakdagi sud ishlari uchun noxolislik taassurotini uyg‘otishi mumkin. Sud o‘zining ishini, ijro organi o‘zining ishini qilgani ma’qul”, — deb yozgan.

Oliy sud tomonidan ta’kidlanishicha, Bo‘stonliq tumaniga uyushtirilgan press-tur tashkilotchisi Oliy sud emas. Ayni tadbirdan ko‘zlangan asosiy maqsad aholiga xolis va haqqoniy axborot yetkazishdir, bu jarayonda noqonuniy qurilmalarni buzish yuzasidan Oliy sud sudyalari tomonidan qabul qilingan sud qarorlariga tushuntirish berish bo‘lgani bois Oliy sud rahbariyati tashkilotchi ishchi guruhi press-tur ishtirokchilari bo‘lgan jurnalist va blogerlarning qat’iy talabiga ko‘ra, ishtirok etish haqidagi taklifni qabul qilgan.

“Qolaversa, sud hujjatlariga tushuntirish berish sudning to‘g‘ridan to‘g‘ri vakolatiga kiradi. Shunga qaramay huquqiy tushuntirishlarni go‘yoki sud organi ijroiya hokimiyatiga ‘advokatlik qilish’ tariqasida talqin qilib, bu haqda ijtimoiy tarmoqlar orqali bong urish, yumshoq qilib aytganda, mas’uliyatsizlik va oqni qora deyishdan boshqa narsa emas”, — deyiladi Oliy sudning izohida.

Qayd etilishicha, Bo‘stonliqdagi ayrim qurilmalarni buzishga oid nizolar o‘sha joyning o‘zida, ya’ni sayyor sud majlislarida ko‘rib chiqilmoqda.

Ma’lum qilinishicha, nizolarni birinchi instansiyada Oliy sud tomonidan ko‘rib chiqilayotgani sud qarorlariga nisbatan tomonlarning shikoyat berish huquqini cheklamaydi va bu press-tur jarayonida mas’ul shaxslar tomonidan alohida qayd etilgan.

“Amaldagi qonunchilikda belgilangan tartibga rioya qilmasdan egallab olingan yer uchastkalari va bajarilgan qurilishlarni buzishdan o‘zgacha tartib belgilanmagan. Sud qarorlari asosida buzilishi belgilangan qurilmalarga oid hujjatlar qalbakilashtirilgani, buning ortidan o‘nlab shaxsga nisbatan jinoyat ishlari qo‘zg‘atilib, bir qancha shaxslar hibsga olingani inkor etib bo‘lmaydigan faktdir”, — deyiladi xabarda.

Eslatib o‘tamiz, press-turda “snos”lar masalasiga Oliy sud raisi o‘rinbosari Xolmo‘min Yodgorov, bosh vazir o‘rinbosari — Turizmni rivojlantirish davlat qo‘mitasi raisi Aziz Abduhakimov o‘z izohlarini bergandi.