Тошкент вилоятининг Бўстонлиқ туманига ноқонуний қурилган объектларнинг бузилиши масаласида уюштирилган пресс-турда Олий суд раҳбарияти иштирок этганди ва бу ижтимоий тармоқларда қизғин муҳокамаларга сабаб бўлмоқда.
Хусусан, Telegram’даги «давлетовуз» канали: «Бугун Тошкент вилоятининг Бўстонлиқ туманида ноқонуний дала ҳовлиларнинг бузилиши бўйича пресс-тур ташкиллаштирилибди. Пресс-турда Олий суд раиси ўринбосари Холмўмин Ёдгоров ҳудудда олиб борилаётган ‘снос’ ишлари бўйича изоҳ берган ва албатта, ‘снос’ларнинг ўринли эканлигини қайд этган.
Олий суд раҳбариятининг бундай тадбирларда иштирок этиши, назаримизда, судларнинг обрўсига, мустақиллик принципларига тўғри келмайди. Шу жойга борганининг ўзиёқ ва бундай интервью бергани, айниқса, унинг мазмуни келажакдаги суд ишлари учун нохолислик таассуротини уйғотиши мумкин. Суд ўзининг ишини, ижро органи ўзининг ишини қилгани маъқул», — деб ёзган.
Мавзуга доир: «‘Дача’ларнинг аксарияти хавфсизлик талабларига жавоб бермайди». Олий суд раиси ўринбосари Бўстонлиқдаги «снос»лар ҳақида
Олий суд томонидан таъкидланишича, Бўстонлиқ туманига уюштирилган пресс-тур ташкилотчиси Олий суд эмас. Айни тадбирдан кўзланган асосий мақсад аҳолига холис ва ҳаққоний ахборот етказишдир, бу жараёнда ноқонуний қурилмаларни бузиш юзасидан Олий суд судьялари томонидан қабул қилинган суд қарорларига тушунтириш бериш бўлгани боис Олий суд раҳбарияти ташкилотчи ишчи гуруҳи пресс-тур иштирокчилари бўлган журналист ва блогерларнинг қатъий талабига кўра, иштирок этиш ҳақидаги таклифни қабул қилган.
«Қолаверса, суд ҳужжатларига тушунтириш бериш суднинг тўғридан-тўғри ваколатига киради. Шунга қарамай ҳуқуқий тушунтиришларни гўёки суд органи ижроия ҳокимиятига ‘адвокатлик қилиш’ тариқасида талқин қилиб, бу ҳақда ижтимоий тармоқлар орқали бонг уриш, юмшоқ қилиб айтганда, масъулиятсизлик ва оқни қора дейишдан бошқа нарса эмас», — дейилади Олий суднинг изоҳида.
Қайд этилишича, Бўстонлиқдаги айрим қурилмаларни бузишга оид низолар ўша жойнинг ўзида, яъни сайёр суд мажлисларида кўриб чиқилмоқда.
Маълум қилинишича, низоларни биринчи инстанцияда Олий суд томонидан кўриб чиқилаётгани суд қарорларига нисбатан томонларнинг шикоят бериш ҳуқуқини чекламайди ва бу пресс-тур жараёнида масъул шахслар томонидан алоҳида қайд этилган.
«Амалдаги қонунчиликда белгиланган тартибга риоя қилмасдан эгаллаб олинган ер участкалари ва бажарилган қурилишларни бузишдан ўзгача тартиб белгиланмаган. Суд қарорлари асосида бузилиши белгиланган қурилмаларга оид ҳужжатлар қалбакилаштирилгани, бунинг ортидан ўнлаб шахсга нисбатан жиноят ишлари қўзғатилиб, бир қанча шахслар ҳибсга олингани инкор этиб бўлмайдиган фактдир», — дейилади хабарда.
Мавзуга доир: «Улар орасида собиқ ‘замҳоким’лар бор». Бўстонлиқдаги «снос»лар юзасидан бир қатор мансабдорлар қўлга олингани маълум қилинди
Эслатиб ўтамиз, пресс-турда «снос»лар масаласига Олий суд раиси ўринбосари Холмўмин Ёдгоров, бош вазир ўринбосари — Туризмни ривожлантириш давлат қўмитаси раиси Азиз Абдуҳакимов ўз изоҳларини берганди.
Изоҳ (0)