Qashqadaryo viloyatining Qarshi shahri hokimi Normo‘min Xolboyev yonilg‘i quyish shoxobchasining muhofaza maydonidan xususiy klinika qurish uchun yer maydoni ajratib berdi. Bu haqda “Daryo”ga shikoyat qilgan tadbirkor Baxtiyor Rahimovning aytishicha, hokim qarori bilan ajratilgan yer maydonida qad rostlayotgan xususiy klinika bemorlari zapravkaning 80 ming litrdan ortiq yonilg‘i saqlanadigan ombori yonida davolanishiga to‘g‘ri keladi. Bu esa bemorlar hayotiga katta xavf tug‘diradi.
“Xususiy klinikaga davolanish maqsadida yotgan bemorlar sportchi emas-ku, yonilg‘i quyish shoxobchasi omborida sodir bo‘lishi mumkin bo‘lgan favqulodda holatlarda yugurib, ko‘chaga chiqishga ulgursa, — deydi “Ta’minot savdo servis” MChJ rahbarligidagi avtomobillarga yonilg‘i quyish shoxobchasi mulkdori. — Qolaversa, xususiy klinika muhofaza maydonida qurilayotganligi sababli yonilg‘i saqlovchi omborimizga o‘t o‘chirish mashinalari kirib-chiqishi uchun yo‘l qolmayapti”.
Ma’lum qilinishicha, Baxtiyor Rahimov rahbarligidagi avtomobillarga yonilg‘i quyish shoxobchasining muhofaza maydonida qad rostlayotgan Artro-Med xususiy klinikasi har ikki tomondan ham zapravkalar bilan o‘rab olingan.
“Yangi qurilayotgan xususiy klinika chap tomonda benzin ‘apravka bilan, o‘ngdan esa gaz zapravka bilan o‘rab olingan, — deydi Baxtiyor Rahimov. — Qolaversa, sobiq hokim Jamshid Fozilov davrida tadbirkor uchun ajratib berilgan yer maydoni haqidagi qaror Qarshi shahar Ma’muriy sudining 2019-yil 30-dekabrdagi qarori bilan bekor qilingan. Boisi, shahar hokimining 2019-yil 4-apreldagi qaroriga ko‘ra, xususiy klinika uchun ajratilgan yer maydoni shahar hokimining 2018-yil 26-noyabrdagi qarori bilan fuqaro Mirzayev Mansurga issiqxona qurish uchun ajratilgan yer maydoni ichiga kirganligi aniqlangan”.
Kuzatuvlarimizga ko‘ra, xususiy klinikani o‘ng tomondan o‘rab turgan avtomobillarga suyultirilgan gaz quyish shoxobchasi mas’ullari hududda klinika qurilayotgani bois beton g‘ishtda baland devor qurib, xavfsizlikni ta’minlashga urinmoqda. Biroq bu devor qay darajada xavfsizlikni ta’minlaydi, bunisi noma’lum.
Qarshi shahar Ma’muriy sudining 2019-yil 30-dekabrdagi hal qiluv qarorida aytilishicha, shaharning sobiq hokimi Jamshid Fozilov tomonidan imzolangan 2019-yil 4-apreldagi xususiy klinika qurish uchun yer maydoni ajratish to‘g‘risidagi qaror shahar Qurilish bo‘limi tomonidan taqdim etilgan noto‘g‘ri ma’lumot sababli chiqarilgan bo‘lib, aynan shu sabab sud tomonidan bekor qilingan.
Biroq shaharning yangi hokimi Normo‘min Xolboyev 2020-yil 3-iyun kuni sobiq hokim Jamshid Fozilov tomonidan 2019-yil 4-aprel kuni imzolangan va sud tomonidan bekor qilingan qarorni “qonun talablariga muvofiqlashtiryapmiz” deb, yana yonilg‘i quyish shoxobchasining muhofaza maydonidan Artro-Med xususiy korxonasiga 40 sotix yer ajratib berish haqida qaror chiqaradi.
Vaholanki, viloyat bosh arxitektori Sh.Qurbonovning 2020-yil 18-maydagi Qarshi shahar hokimiga yozgan bildirish xatida yonilg‘i quyish shoxobchasi uy-joy va jamoat binolari, odamlar ko‘p to‘planadigan maskanlardan 60 metr uzoqlikda bo‘lishi lozimligi eslatilgan.
Shuningdek, shahar Favqulotda vaziyatlar bo‘limi boshlig‘i M.Ahmedov ham 2020-yil 7-maydagi xulosasida Artro-Med xususiy klinikasi yonilg‘i quyish shoxobchasi muhofaza maydoniga kirib borganligini, yong‘in xavfsizligi uchun orqaliq masofa qoldirilmayotganligini ma’lum qilgan. Shunga qaramasdan shahar hokimi xususiy klinika qurish uchun ruxsat bergan.
Hokimning ushbu qarori qay darajada asosli ekanligini bilish maqsadida Qarshi shahar hokimi Normo‘min Xolboyev bilan bu haqda muloqot qildik.
“Mutaxassislarimiz vaziyatni qayta o‘rganib chiqadi va ikki kun ichida batafsil ma’lumot beriladi. Agar yangi qurilayotgan xususiy klinika haqiqatdan ham yonilg‘i quyish shoxobchasining muhofaza zonasiga kirgan bo‘lsa, adolatli qaror chiqariladi”, — degan hokim bir hafta vaqt o‘tsa-da, na muammoni o‘rgandi va na bizning so‘rovimizga tayinli javob qaytardi.
“Ayni paytda xususiy klinika qurilishi yakunlanmoqda. Klinika binosi va zapravka o‘rtasida 25 metr masofa qolgan. Men yong‘in xavfsizligi uchun besh metr balandlikda devor qurilib, shu masofa qolsa ham roziman. Texnikalar kirib-chiqishi uchun imkon bo‘lsa, bunga ham yo‘q demayapman. Ammo xususiy klinika rahbari yonilg‘i saqlovchi omborim yonidan qo‘shimcha binolar qurib, bemorlarning dam olishi uchun o‘rindiqlar o‘rnatishni, xullas zapravka tagiga qadar kirib kelishni maqsad qilgan. Xususiy klinika rahbarining ‘Menga hokimlik tomonidan qaror berilgan’ deya odamlar hayotini xavf ostiga qo‘yishi meni xavotirga qo‘ymoqda”, — deydi “Ta’minot savdo servis” MChJ rahbarligidagi avtomobillarga yonilg‘i quyish shoxobchasi mulkdori Baxtiyor Rahimov.
Baxtiyor Rahimov “Daryo” muxbiri bilan suhbati davomida shaharning yangi hokimi Normo‘min Xolboyev dastlab xususiy klinika rahbariga zapravka oldiga tiqilmaslikni aytgan bo‘lsa-da, biroz muddat o‘tgach teskari tomonga o‘zgarganini va bo‘layotgan nohaqlikka jim qarab turganini aytmoqda.
“Daryo” ushbu holat yuzasidan Qarshi shahar hokimligidan tayinli javob kutadi va mavzuga qaytadi.
Izoh (0)