Buxoro viloyatining Buxoro tumanida avtomobilda mast holda uxlab qolgan 33 yoshli ayol Dilbar Saidovaning (barcha ism-familiyalar o‘zgartirilgan) bir million so‘m turadigan telefonini o‘g‘irlagan 18 yoshli o‘quvchi qiz Saida jarimaga tortildi. Bu haqda “Daryo”ga Jinoyat ishlari bo‘yicha Buxoro tuman sudi raisi Nozim Jo‘rayev ma’lum qildi.
Ma’lumot berilishicha, 2019-yil 10-dekabr kuni fuqaro Dilbar Saidova uch nafar erkak tanishlari va 18 yoshli o‘quvchi qiz Saida bilan Buxoro shahridagi “Yaguar” restoranida ovqatlangan va spirtli ichimlik ichgan.
O‘sha kuni kechki payt Buxoro tumanining “Yangi-turmush” mahallasiga qaytgan Dilbar Saidova shu qishloqda yashovchi fuqaroga tegishli Spark’ning orqa o‘rindig‘ida uxlab qolgan. Tanishining mast holda uxlab qolganidan foydalgan o‘quvchi qiz Saida esa uning kiyimi cho‘ntagidan bahosi bir million so‘m bo‘lgan telefonini o‘g‘irlagan.
Dilbar Saidova o‘ziga kelgach, telefoni yo‘qolganini bilgan va tuman IIBga murojaat qilgan. Bir necha kundan so‘ng sud oldi tergov-surishtiruv jarayonida telefon fuqaroning tanishi o‘quvchi qiz Saida tomonidan o‘g‘irlangani aniqlangan.
O‘quvchi qiz telefonni Buxoro shahridagi Markaziy bozor hududidagi telefon ustaxonasiga olib borganini va unga yangi dastur o‘rnatib, o‘zi ishlatib kelganini bildirgan.
2020-yil 26-iyun kuni mazkur ishni ko‘rib chiqqan sud o‘quvchi qizning aybiga iqrorligi, qilmishidan pushaymonligi, jabrlanuvchiga yetkazilgan zararning to‘liq qoplangani-yu, uning voyaga yetmaganini inobatga olib, uni Jinoyat kodeksining 169-moddasi 2-qismi (Jabrlanuvchining kiyimi, sumkasi yoki boshqa qo‘l yukidagi ashyoga nisbatan kissavurlik) bilan aylab, Jinoyat kodeksining 82-moddasiga asosan jarima tayinlagan.
Izoh (0)