Бухоро вилоятининг Бухоро туманида автомобилда маст ҳолда ухлаб қолган 33 ёшли аёл Дилбар Саидованинг (барча исм-фамилиялар ўзгартирилган) бир миллион сўм турадиган телефонини ўғирлаган 18 ёшли ўқувчи қиз Саида жаримага тортилди. Бу ҳақда «Дарё»га Жиноят ишлари бўйича Бухоро туман суди раиси Нозим Жўраев маълум қилди.
Маълумот берилишича, 2019 йил 10 декабрь куни фуқаро Дилбар Саидова уч нафар эркак танишлари ва 18 ёшли ўқувчи қиз Саида билан Бухоро шаҳридаги «Ягуар» ресторанида овқатланган ва спиртли ичимлик ичган.
Ўша куни кечки пайт Бухоро туманининг «Янги-турмуш» маҳалласига қайтган Дилбар Саидова шу қишлоқда яшовчи фуқарога тегишли Spark’нинг орқа ўриндиғида ухлаб қолган. Танишининг маст ҳолда ухлаб қолганидан фойдалган ўқувчи қиз Саида эса унинг кийими чўнтагидан баҳоси бир миллион сўм бўлган телефонини ўғирлаган.
Дилбар Саидова ўзига келгач, телефони йўқолганини билган ва туман ИИБга мурожаат қилган. Бир неча кундан сўнг суд олди тергов-суриштирув жараёнида телефон фуқаронинг таниши ўқувчи қиз Саида томонидан ўғирлангани аниқланган.
Ўқувчи қиз телефонни Бухоро шаҳридаги Марказий бозор ҳудудидаги телефон устахонасига олиб борганини ва унга янги дастур ўрнатиб, ўзи ишлатиб келганини билдирган.
2020 йил 26 июнь куни мазкур ишни кўриб чиққан суд ўқувчи қизнинг айбига иқрорлиги, қилмишидан пушаймонлиги, жабрланувчига етказилган зарарнинг тўлиқ қоплангани-ю, унинг вояга етмаганини инобатга олиб, уни Жиноят кодексининг 169-моддаси 2-қисми (Жабрланувчининг кийими, сумкаси ёки бошқа қўл юкидаги ашёга нисбатан киссавурлик) билан айлаб, Жиноят кодексининг 82-моддасига асосан жарима тайинлаган.
Изоҳ (0)