O‘zbekistondagi salkam 1200 ta maktab filiallari faoliyati tugatiladi — ular bosqichma-bosqich ravishda to‘laqonli maktablarga aylantiriladi. Bu haqda Xalq ta’limi vazirligi matbuot xizmati xabar berdi.
Ma’lumotlarga ko‘ra, so‘nggi ikki yil ichida 80 ta yangi maktab qurilgan, 806 tasi — rekonstruksiya qiligan, 1224 tasi — mukammal ta’mirlangan, 2551 tasi — “burjuyka” pechlardan xalos bo‘lgan va 775 ta maktab toza ichimlik suvi bilan ta’minlangan.
“Shunga qaramay, hali qilinishi kerak bo‘lgan ishlar juda ko‘p, maktablarning umumiy soni 10 mingga yaqin. So‘nggi vaqtlarda ijtimoiy tarmoqlarda ba’zi maktablarning achinarli holati tanqid qilinayotgani ham kuzatilmoqda”, — deyiladi xabarda.Ta’kidlanishicha, eng og‘ir masala — bu maktab filiallaridir.
“Aksariyat holatlarda ular aholi tomonidan hashar yo‘li bilan qurilib asosiy maktabga qatnash o‘rniga o‘sha yerda o‘qish tashkil etilgan. Ulardagi ahvol achinarliligi bilan birgalikda, o‘quvchi soni juda kam bo‘lganiga sifatli ta’limni ham tashkil etib bo‘lmaydi. Odatda 1-2 sinfxonadan iborat va bir sinfda 2-3 tadan 1—3-sinf o‘quvchilari ham o‘qiydiganlari anchagina”, — deyiladi xabarda.
Oxirgi 2 yilda 149 ta maktab filiallari faoliyati tugatilgan, ulardan 125 tasiga maktab maqomi berilgan. Qayd etilishicha, hozirgi kunda ham 1179 ta maktab filiallari o‘z faoliyatini davom ettirmoqda. Ularning ham bosqichma-bosqich faoliyati tugatilishi, aholi o‘sadigan hududlarda to‘laqonli maktabga aylantirilishi zarur.
“Shuning uchun, maktablarga yordam uchun markazlashgan davlat investitsiya mablag‘lari, mahalliy budjet hamda homiylik mablag‘lari jalb etilishida joylardagi mutassaddilarning ham yordami muhim”, — deyiladi XTV xabarida.
Avvalroq xalq ta’limi vaziri Sherzod Shermatov maktablarga sharoit yaratishda ko‘p masala hokimlarga bog‘liq ekanini aytgan edi.
Izoh (0)