Ўзбекистондаги салкам 1200 та мактаб филиаллари фаолияти тугатилади — улар босқичма-босқич равишда тўлақонли мактабларга айлантирилади. Бу ҳақда Халқ таълими вазирлиги матбуот хизмати хабар берди.
Маълумотларга кўра, сўнгги икки йил ичида 80 та янги мактаб қурилган, 806 таси — реконструкция қилиган, 1224 таси — мукаммал таъмирланган, 2551 таси — «буржуйка» печлардан халос бўлган ва 775 та мактаб тоза ичимлик суви билан таъминланган.
«Шунга қарамай, ҳали қилиниши керак бўлган ишлар жуда кўп, мактабларнинг умумий сони 10 мингга яқин. Сўнгги вақтларда ижтимоий тармоқларда баъзи мактабларнинг ачинарли ҳолати танқид қилинаётгани ҳам кузатилмоқда», — дейилади хабарда.Таъкидланишича, энг оғир масала — бу мактаб филиалларидир.
«Аксарият ҳолатларда улар аҳоли томонидан ҳашар йўли билан қурилиб асосий мактабга қатнаш ўрнига ўша ерда ўқиш ташкил этилган. Улардаги аҳвол ачинарлилиги билан биргаликда, ўқувчи сони жуда кам бўлганига сифатли таълимни ҳам ташкил этиб бўлмайди. Одатда 1-2 синфхонадан иборат ва бир синфда 2-3 тадан 1—3-синф ўқувчилари ҳам ўқийдиганлари анчагина», — дейилади хабарда.
Охирги 2 йилда 149 та мактаб филиаллари фаолияти тугатилган, улардан 125 тасига мактаб мақоми берилган. Қайд этилишича, ҳозирги кунда ҳам 1179 та мактаб филиаллари ўз фаолиятини давом эттирмоқда. Уларнинг ҳам босқичма-босқич фаолияти тугатилиши, аҳоли ўсадиган ҳудудларда тўлақонли мактабга айлантирилиши зарур.
«Шунинг учун, мактабларга ёрдам учун марказлашган давлат инвестиция маблағлари, маҳаллий бюджет ҳамда ҳомийлик маблағлари жалб этилишида жойлардаги мутассаддиларнинг ҳам ёрдами муҳим», — дейилади ХТВ хабарида.
Аввалроқ халқ таълими вазири Шерзод Шерматов мактабларга шароит яратишда кўп масала ҳокимларга боғлиқ эканини айтган эди.
Изоҳ (0)