Xalqaro moliya korporatsiyasi (XMK) va Yevropa tiklanish va taraqqiyot banki (YeTTB) Indorama Kokand Fertilizers and Chemicals (avvalgi “Qo‘qon superfosfat zavodi”) zavodini modernizatsiya qilish uchun 12,5 million dollarlik uzoq muddatli kredit bilan ta’minladi, deya xabar beradi “Gazeta.uz”.
Investitsiyalar kompaniyaga o‘g‘it ishlab chiqarishni kutilganidek, yiliga 100 ming tonnadan 350 ming tonnagacha oshirish uchun energiya tejaydigan texnologiyalarni joriy etishga yordam beradi. Zavod ichki ehtiyojlarini qondirgandan keyin yiliga 75 ming tonna o‘g‘itni eksport qilish imkoniyatiga ega bo‘ladi.
“Qo‘qon superfosfat zavodi” 2019-yil Singapurda joylashgan Indorama Holdings B.V. tomonidan xususiylashtirildi, u zavodning 95,54 foiz aksiyalariga egalik qiladi.
“O‘zbekiston keng ko‘lamli o‘g‘itlarni ishlab chiqarish uchun o‘z xomashyo bazasiga ega dunyodagi sanoqli davlatlardan biri hisoblanadi. Ammo, asosan, davlat tomonidan boshqariladigan sektor, investitsiyalarning yetarli emasligi, ishlab chiqarishning samarasizligi va resurslarning haddan tashqari sarflanishi bilan bog‘liq qiyinchiliklarni boshdan kechirdi. Yangi sarmoyalar va texnologiyalar tufayli O‘zbekiston kimyo sanoati yangi ish o‘rinlari yaratish, boshqa sanoat va xizmatlarni rivojlantirish, shuningdek, hosilni ko‘paytirish orqali oziq-ovqat xavfsizligini ta’minlash bilan bir qatorda eksportni rag‘batlantirish uchun katta imkoniyatlarga ega bo‘ladi”, — deb ta’kidladi XMK kredit berish to‘g‘risidagi qarorni sharhlab.
Izoh (0)