O‘zbekistonda qator korxonalarga eksklyuziv imtiyozlar berish huquqi bekor qilinishi mumkin

“Raqobat muhitiga salbiy ta’sir ko‘rsatadigan ayrim xo‘jalik yurituvchi subyektlarga berilgan eksklyuziv huquqlar, individual soliq va bojxona imtiyozlari, preferensiyalarni bekor qilish to‘g‘risida”gi Prezident farmoni loyihasi normativ-huquqiy hujjatlar loyihalari muhokamasi portaliga joylashtirildi.

Monopoliyaga qarshi kurashish qo‘mitasi ishlab chiqqan loyihada “O‘zmetkombinat”ning qora metallarni, “O‘zikkilamchiranglimetall”ning rangli metallarni, “Davlatbelgisi”ning turli xil qog‘oz mahsulotlarini ishlab chiqarishidagi monopol holati va eksklyuziv huquqlari, “O‘zstandart” agentligiga tegishli o‘lchov vositalarini tekshirish va shtrix-kodlarni berish bo‘yicha korxonalari kabi monopoliyalar bekor qilinishi taklif etilmoqda.

“O‘zmetkombinat” AJ va “O‘zikkilamchiranglimetall” AJning monopsoniyasi (mutlaq sotib oluvchining huquqi) o‘rniga uning tarkibidan ixtisoslashtirilgan punktlarni ajratish yo‘li bilan qora va rangli metallarning parchalari va chiqindilarini sotib olish bo‘yicha mustaqil korxona tashkil etish ko‘zda tutilgan.

Qo‘mita yangi tashkil etilgan korxona tomonidan qora va rangli metallarning parchalari va chiqindilarini faqat birja savdolarida barcha metalldan ishlangan buyumlarni ishlab chiqaruvchilarning xomashyolarga teng kirishi ta’minlagan holda sotilishini taklif etilmoqda.

Shuningdek, ushbu hujjatda “O‘zbekipaksanoat”, “O‘zyog‘moysanoat”, “O‘zeltexsanoat”, “Parrandasanoat”, “O‘zbekistonasalarichilari”, kartoshka ishlab chiqaruvchilar, “O‘zcharmsanoat” kabi turli birlashmalar a’zolariga, individual paxta va to‘qimachilik klasterlarga hamda Xalq banki va “Mikrokreditbank”larga beriladigan imtiyoz va preferensiyalari bekor qilinishi ham rejalashtirilgan.

Farmon loyihasida “Birinchi rezinotexnika zavodi” MChJga berilgan preferensiyalarni bekor qilish ko‘zda tutilmoqda.

2019-yili hukumat qarori bilan “Birinchi rezinotexnika zavodi” MChJ qishloq xo‘jaligi va avtomobil shinalarining yagona yetkazib beruvchisi etib belgilangan edi. Davlat (budjet va korporativ) buyurtmachilariga jamiyat mahsulotlarini maxsus ma’lumotlar portalida ro‘yxatdan o‘tkaziladigan to‘g‘ridan to‘g‘ri shartnomalar asosida xarid qilishga ruxsat berilgan edi. Mazkur normani bekor qilish taklif etilyapti.

Farmon loyihasida, shuningdek, Akfa Medline MChJ va Akfa universitetiga hamda hukumatning 2020-yil iyun oyidagi qarori bilan Textile Technologies Group korxonasiga berilgan bojxona imtiyozlarini bekor qilish taklif etilgan.

Farmon va qonun loyihalarining muhokamalari 16-iyulga qadar davom etadi.