Shuhrat G‘aniyev: Men “So‘x voqealari” degan iboraga qarshiman

Farg‘ona viloyati hokimi Shuhrat G‘aniyev may oyida So‘x tumanida bo‘lib o‘tgan voqealarni “So‘x voqealari” sifatida talqin qilinishiga qarshiligini bildirdi. U bu haqda 25-iyun, payshanba kuni jurnalistlar bilan bo‘lib o‘tgan ochiq muloqotda aytib o‘tdi, deya xabar berdi “Daryo” muxbiri Musulmonbek Ibrohimov.

Eslatib o‘tamiz, O‘zbekiston—Qirg‘iziston chegarasida joylashgan Chashma bulog‘i oldida 31-may kuni ikki mamlakat fuqarolari o‘rtasida ziddiyat kelib chiqqan. O‘zbekiston bosh vaziri Abdulla Aripov 1-iyun kuni voqea yuz bergan joyga tashrif buyurib, aholi bilan uchrashgan.

Abdulla Aripov Qirg‘iziston rasmiylari bilan hodisa yuzasidan muzokara olib borgan. Shu kuni O‘zbekiston va Qirg‘iziston prezidentlari mazkur hodisani telefon orqali muhokama qilgan. Mojaro oqibatida 187 nafar o‘zbekistonlik kasalxonaga yotqizilgan, O‘zbekiston tomonda uchta xonadon yonib ketgan. Qirg‘izistonning Botken viloyatida esa uy va omborxonada yong‘in sodir bo‘lgan, shuningdek, 25 kishi jarohat olgan.

Mazkur voqealar ortidan O‘zbekiston hukumati a’zolari hududdagi muammolarni o‘rganish uchun 2-iyun kuni u yerga tashrif buyurgan. So‘x tumaniga yangi hokim va ichki ishlar bo‘limiga yangi rahbar tayinlangandi.

Muloqotda Shuhrat G‘aniyev mazkur nizolar haqida gapirganda ularga “So‘x voqealari” deya ta’rif bermaslik lozimligini aytib o‘tdi.

“Albatta, anklav hudud bo‘lganidan keyin anklav hududning o‘ziga yarasha muammolari bo‘ladi. Anklav hudud bilan ishlab yurgan rahbar, ishlab ko‘rgan xodim, ishlab ko‘rgan boshqa soha vakillari biladi. Shuning uchun ‘So‘x voqealari’ deb talqin qilmasliginglarni iltimos qilaman. Chunki bu yerda ikki mamlakat fuqarolari ahil-inoq bo‘lib ming yillardan buyon yashab keladi. Qo‘shni Qirg‘iziston xalqi bilan dilimiz ham, dinimiz ham, bozorimiz ham, mozorimiz ham bir — hammamiz birmiz”, — dedi u.

Viloyat hokimi So‘x tumanida katta bunyodkorlik ishlari amalga oshirilayotganiga alohida urg‘u berib o‘tdi.

“Iyun oyining o‘zida 2563 ta yangi ish o‘rni yaratildi. Tumanda jami 390 milliard so‘m sarflanishi belgilab olingan bo‘lsa, ishlar oyma-oy amalga oshirib kelinmoqda. Bundan tashqari qo‘shimcha yer, qo‘shimcha suv zaxirasini tashkil etish belgilangan. Qo‘shimcha yer qo‘shimcha ish o‘rni degani. Qo‘shma korxonalar tashkil qilish bo‘yicha O‘zbekiston bosh vaziri rahbarligida tuzilgan hukumat ishchi guruhi bor. Ishchi guruhdagi bosh vazir o‘rinbosarlarining barchasi o‘z yo‘nalishlari bo‘yicha tumanga amaliy yordam berib kelmoqda”, — degan G‘aniyev.