Xabarlarimiz sarlavhada tilga olingan asosiy muhokamali mavzularni qamrab oladi. Va nafaqat bular, boshqa dolzarb xabarlarimiz ham bor. Dayjestimizni boshladik.
O‘zbekistonda gender tengligini mustahkamlash borasida yana bir qadam bosildi. Feruza Mahmudova O‘zbekistonning Isroildagi favqulodda va muxtor elchisi etib tayinlandi. Senat raisasi Tanzila Norboyeva shu kunga qadar O‘zbekistonda 130 dan ziyod xorijiy davlatlar bilan diplomatik aloqalar o‘rnatilgan bo‘lsa, hali birorta ayol elchi tayinlanmaganini ta’kidladi. Tashqi ishlar vaziri Ilhom Ne’matov Mahmudovaning nomzodini senatorlarga tanishtirarkan, “bugun O‘zbekistonning mustaqil diplomatiyasi tarixida ilk bor elchi lavozimiga hurmatli ayollarimiz orasidan nomzod taqdim etildi”, dedi.
Biroq Mahmudova birinchi ayol elchi, deb aytilishi ko‘pchilikda taajjub uyg‘otdi. Chunki mustaqil O‘zbekistonning birinchi ayol elchisi Gulnora Karimovadir. U 2010—2011-yillarda O‘zbekistonning Ispaniyadagi favqulodda va muxtor elchisi bo‘lgan. U 2010-yil 18-mart kuni Madriddagi Qirollik saroyida qirol Xuan Karlosga ishonch yorliqlarini topshirgan. Ispaniya Tashqi ishlar vazirligi ma’lumotiga ko‘ra, Karimova xonimning elchiligi 2011-yil oktabriga qadar davom etgan.
* * *
O‘zbekistonning barcha hududiy aeroportlarida 2020-yilning 1 avgustidan “Ochiq osmon” rejimi joriy etiladi. Bu rejim Xalqaro havo transporti uyushmasi IATA’ning “Qish 2022/2023” mavsumi yakunigacha ikki yil muddatga uni uzaytirish yoki shartlarni o‘zgartirish imkoniyati bilan joriy qilinadi. Mazkur rejim O‘zbekistonning Qarshi, Nukus, Termiz, Buxoro, Navoiy, Urganch, Andijon, Farg‘ona, Namangan va Samarqand shahridagi aeroportlarda “beshinchi havo erkinligi” huquqini qo‘llagan holda joriy qilinadi.
Mazkur rejimga muvofiq, Navoiy va Termiz shahridagi aeroportlarda xorijiy aviakompaniyalarga yuk tashish parvozlarini amalga oshirish uchun “yettinchi havo erkinligi”ga qadar bo‘lgan huquqlar beriladi. “Yettinchi havo erkinligi” ro‘yxatga olingan mamlakatidan qat’i nazar har qanday xorijiy aviakompaniyaga har qanday chastotada parvozlarni amalga oshirish huquqini beradi.
* * *
Ikki haftadirki, Ichki ishlar xodimlari trenddan tushmayapti. Goh jirkanch, goh kulgili ishlar sodir etib muhokama markazida turishibdi. Agar Toshkent shahar IIBB Yashnobod tumani bo‘limi Adobe Photoshop dasturini yaxshi biluvchi dizayner olganida yopig‘liq qozon yopig‘ligicha qolishi mumkin edi. Ammo bunday bo‘lmadi. “Saxovat va ko‘mak” xayriyasida ishtirok etayotgan podpolkovnikning hisobot rasmlarida uning yuziga niqob rasmini chizib qo‘yishgani sezilib qoldi. Chunki uning ko‘zgudagi aksida niqobi yo‘q edi.
Bu no‘noqlarcha qilingan montaj internetda chaqindek tarqaldi. Toshkent shahar IIBB tarqatgan suratlardan so‘ng esa niqob taqishni qoidalarini eng ko‘p buzadigan Yashnobod tumanida IIB boshlig‘i ham qoidabuzar ekanligi ma’lum bo‘ldi. Tibbiy niqob taqmagan fuqaroni mashinaga tiqishga tayyor militsiya xodimlarining o‘zi qoidaga rioya qilmasligi ommada taajjub uyg‘otdi va yuzlab izohlar yozildi.
Shundan so‘ng Toshkent shahar IIBB salbiy izohlarning oldini olish maqsadida ba’zi suratlardagi niqoblar chizib qo‘yilganini tasdiqladi va buni xato sifatida tan oldi.
O‘rni kelganda aytish kerakki, Senat raisasi Tanzila Norboyeva 19-iyun kuni “Yaxshiyam ijtimoiy tarmoqlar bor ekan, hozir bizga hamma masalalarni ochiq-oydin ko‘rsatib beryapti”, deya tarmoq yuzerlarini e’tirof etganicha bor. Chunki IIBchilarning uquvsiz fotomontajini fosh etishda tarmoq yuzerlari ancha-muncha faollik ko‘rsatdi.
* * *
Bu hafta koronavirus sezdirmasdan Vazirlar Mahkamasigacha kirib bordi. Payshanba kuni Vazirlar Mahkamasining ikki nafar xodimi kasallikni yuqtirib olgani tasdiqlandi. Koronavirus ularda simptomlarsiz kechmoqda. Xodimlar shifokorlar nazoratiga olindi. Ular bilan ish jarayonida muloqotda bo‘lgan xodimlar ikki hafta muddatga karantinga o‘tkazildi. Vazirlar Mahkamasi doimiy tartibda ishlamoqda.
Shuningdek, aholi orasidan ham koronavirusga chalinganlar chiqmoqda. Koronavirus Info kanali ularning manzili va ism-shariflari bosh harfini chop eta boshladi. Ta’kidlab o‘tamizki, aholi orasidagi yuqish holatlari birmuncha tashvishlidir. Chunki ular necha kishiga yuqtirgani aniq emas.
Eng oxirgi xabarga ko‘ra, Ozbekistonda yana 43 kishida koronavirus aniqlandi. Ularning bari karantin markazidagilardir. O‘zbekistonda koronavirusga chalinganlar 6358 nafarga yetdi.
* * *
Andijonlik fuqaro A. Abdukarimovni Ichki ishlar xodimlari urib o‘ldirgani haqida avval xabar bergan edik. Bu fojia yuzasidan deputatlar Qodir Jo‘rayev va Rasul Kusherboyevlar fikr bildirib, aybdorlarni javobgarlikka tortishning o‘zi yetarli emasligini, Ichki ishlar vazirligi kechirim so‘rashi kerakligini aytdi. “Adolat” SDP siyosiy kengashi raisi Narimon Umarov hamda Inson huquqlari bo‘yicha Milliy markaz bu amalni qoraladi.
Shundan so‘ng IIV rahbariyati, Andijon hokimligi va viloyat IIB vakillari vafot etgan fuqaroning oilasidan uzr so‘radi. Bu haqda 1991–2006-yillar davomida Ichki ishlar vaziri lavozimida ishlagan, 2018-yil fevral oyidan buyon vazir maslahatchisi sifatida ishlab kelayotgan Zokirjon Almatov gapirdi. “Afsus bilan aytaman, bizning xodimlar orasida ham o‘zini tuta olmaydigan, o‘z lavozimini o‘ylaydiganlar uchrab turadi. Yaqinda Andijonda bo‘lgan voqeani nadomat bilan gapiraman... Bir yigit ichki ishlar organlari xodimlari harakatining qurboni bo‘ldi. Bu xudbin, ichki ishlar xodimlarining nomiga dog‘ tushirgan odamlar kecha-yu kunduz ishlayotgan boshqa xodimlarning obro‘siga putur yetkazdi. Ular militsiyaga xoinlik qildi”, deb aytgan sobiq vazir.
“Daryo”da qoling va eng so‘nggi yangiliklardan xabardor bo‘ling. Karantin talablariga rioya qiling.
Izoh (0)