Хабарларимиз сарлавҳада тилга олинган асосий муҳокамали мавзуларни қамраб олади. Ва нафақат булар, бошқа долзарб хабарларимиз ҳам бор. Дайжестимизни бошладик.
Ўзбекистонда гендер тенглигини мустаҳкамлаш борасида яна бир қадам босилди. Феруза Маҳмудова Ўзбекистоннинг Исроилдаги фавқулодда ва мухтор элчиси этиб тайинланди. Сенат раисаси Танзила Норбоева шу кунга қадар Ўзбекистонда 130 дан зиёд хорижий давлатлар билан дипломатик алоқалар ўрнатилган бўлса, ҳали бирорта аёл элчи тайинланмаганини таъкидлади. Ташқи ишлар вазири Илҳом Неъматов Маҳмудованинг номзодини сенаторларга таништираркан, «бугун Ўзбекистоннинг мустақил дипломатияси тарихида илк бор элчи лавозимига ҳурматли аёлларимиз орасидан номзод тақдим этилди», деди.
Бироқ Маҳмудова биринчи аёл элчи, деб айтилиши кўпчиликда таажжуб уйғотди. Чунки мустақил Ўзбекистоннинг биринчи аёл элчиси Гулнора Каримовадир. У 2010—2011 йилларда Ўзбекистоннинг Испаниядаги фавқулодда ва мухтор элчиси бўлган. У 2010 йил 18 март куни Мадриддаги Қироллик саройида қирол Хуан Карлосга ишонч ёрлиқларини топширган. Испания Ташқи ишлар вазирлиги маълумотига кўра, Каримова хонимнинг элчилиги 2011 йил октябрига қадар давом этган.
* * *
Ўзбекистоннинг барча ҳудудий аэропортларида 2020 йилнинг 1 августидан «Очиқ осмон» режими жорий этилади. Бу режим Халқаро ҳаво транспорти уюшмаси IATA’нинг «Қиш 2022/2023» мавсуми якунигача икки йил муддатга уни узайтириш ёки шартларни ўзгартириш имконияти билан жорий қилинади. Мазкур режим Ўзбекистоннинг Қарши, Нукус, Термиз, Бухоро, Навоий, Урганч, Андижон, Фарғона, Наманган ва Самарқанд шаҳридаги аэропортларда «бешинчи ҳаво эркинлиги» ҳуқуқини қўллаган ҳолда жорий қилинади.
Мазкур режимга мувофиқ, Навоий ва Термиз шаҳридаги аэропортларда хорижий авиакомпанияларга юк ташиш парвозларини амалга ошириш учун «еттинчи ҳаво эркинлиги»га қадар бўлган ҳуқуқлар берилади. «Еттинчи ҳаво эркинлиги» рўйхатга олинган мамлакатидан қатъи назар ҳар қандай хорижий авиакомпанияга ҳар қандай частотада парвозларни амалга ошириш ҳуқуқини беради.
* * *
Икки ҳафтадирки, Ички ишлар ходимлари тренддан тушмаяпти. Гоҳ жирканч, гоҳ кулгили ишлар содир этиб муҳокама марказида туришибди. Агар Тошкент шаҳар ИИББ Яшнобод тумани бўлими Adobe Photoshop дастурини яхши билувчи дизайнер олганида ёпиғлиқ қозон ёпиғлигича қолиши мумкин эди. Аммо бундай бўлмади. «Саховат ва кўмак» хайриясида иштирок этаётган подполковникнинг ҳисобот расмларида унинг юзига ниқоб расмини чизиб қўйишгани сезилиб қолди. Чунки унинг кўзгудаги аксида ниқоби йўқ эди.
Бу нўноқларча қилинган монтаж интернетда чақиндек тарқалди. Тошкент шаҳар ИИББ тарқатган суратлардан сўнг эса ниқоб тақишни қоидаларини энг кўп бузадиган Яшнобод туманида ИИБ бошлиғи ҳам қоидабузар эканлиги маълум бўлди. Тиббий ниқоб тақмаган фуқарони машинага тиқишга тайёр милиция ходимларининг ўзи қоидага риоя қилмаслиги оммада таажжуб уйғотди ва юзлаб изоҳлар ёзилди.
Шундан сўнг Тошкент шаҳар ИИББ салбий изоҳларнинг олдини олиш мақсадида баъзи суратлардаги ниқоблар чизиб қўйилганини тасдиқлади ва буни хато сифатида тан олди.
Ўрни келганда айтиш керакки, Сенат раисаси Танзила Норбоева 19 июнь куни «Яхшиям ижтимоий тармоқлар бор экан, ҳозир бизга ҳамма масалаларни очиқ-ойдин кўрсатиб беряпти», дея тармоқ юзерларини эътироф этганича бор. Чунки ИИБчиларнинг уқувсиз фотомонтажини фош этишда тармоқ юзерлари анча-мунча фаоллик кўрсатди.
* * *
Бу ҳафта коронавирус сездирмасдан Вазирлар Маҳкамасигача кириб борди. Пайшанба куни Вазирлар Маҳкамасининг икки нафар ходими касалликни юқтириб олгани тасдиқланди. Коронавирус уларда симптомларсиз кечмоқда. Ходимлар шифокорлар назоратига олинди. Улар билан иш жараёнида мулоқотда бўлган ходимлар икки ҳафта муддатга карантинга ўтказилди. Вазирлар Маҳкамаси доимий тартибда ишламоқда.
Шунингдек, аҳоли орасидан ҳам коронавирусга чалинганлар чиқмоқда. Koronavirus Info канали уларнинг манзили ва исм-шарифлари бош ҳарфини чоп эта бошлади. Таъкидлаб ўтамизки, аҳоли орасидаги юқиш ҳолатлари бирмунча ташвишлидир. Чунки улар неча кишига юқтиргани аниқ эмас.
Энг охирги хабарга кўра, Озбекистонда яна 43 кишида коронавирус аниқланди. Уларнинг бари карантин марказидагилардир. Ўзбекистонда коронавирусга чалинганлар 6358 нафарга етди.
* * *
Андижонлик фуқаро А. Абдукаримовни Ички ишлар ходимлари уриб ўлдиргани ҳақида аввал хабар берган эдик. Бу фожиа юзасидан депутатлар Қодир Жўраев ва Расул Кушербоевлар фикр билдириб, айбдорларни жавобгарликка тортишнинг ўзи етарли эмаслигини, Ички ишлар вазирлиги кечирим сўраши кераклигини айтди. «Адолат» СДП сиёсий кенгаши раиси Наримон Умаров ҳамда Инсон ҳуқуқлари бўйича Миллий марказ бу амални қоралади.
Шундан сўнг ИИВ раҳбарияти, Андижон ҳокимлиги ва вилоят ИИБ вакиллари вафот этган фуқаронинг оиласидан узр сўради. Бу ҳақда 1991–2006 йиллар давомида Ички ишлар вазири лавозимида ишлаган, 2018 йил февраль ойидан буён вазир маслаҳатчиси сифатида ишлаб келаётган Зокиржон Алматов гапирди. «Афсус билан айтаман, бизнинг ходимлар орасида ҳам ўзини тута олмайдиган, ўз лавозимини ўйлайдиганлар учраб туради. Яқинда Андижонда бўлган воқеани надомат билан гапираман... Бир йигит ички ишлар органлари ходимлари ҳаракатининг қурбони бўлди. Бу худбин, ички ишлар ходимларининг номига доғ туширган одамлар кеча-ю кундуз ишлаётган бошқа ходимларнинг обрўсига путур етказди. Улар милицияга хоинлик қилди», деб айтган собиқ вазир.
«Дарё»да қолинг ва энг сўнгги янгиликлардан хабардор бўлинг. Карантин талабларига риоя қилинг.
Изоҳ (0)