Yangi zelandiyalik kelinchak to‘y suratiga qarab saratonga chalinganini aniqladi

Yangi zelandiyalik Madlen Kirke-Smit to‘yidagi fotosurati tufayli saratonga chalinganini aniqladi, deb yozadi “Korrespondent.net”.

Kelinchak to‘y marosimidagi suratlardan biriga diqqat bilan qarab ko‘krak sohasida katta shish borligini payqadi. U ertasi kuni shifokorga murojaat qildi hamda Madlenda o‘simta aniqlandi.

Kirke-Smitning aytishicha, ko‘krak sohasidagi o‘zgarishni bundan bir necha yil avval sezgan, lekin o‘shanda unga noto‘g‘ri tashxis qo‘yishgan.

“Men tez orada so‘nggi kimyoterapiya muolajasini olaman, keyin ko‘krak bezini olib tashlash bo‘yicha ikkita operatsiya meni kutmoqda. Kasalligim haqida oldinroq bilganimda, balki, davolash jarayoni osonroq kechardi”, — deydi Madlen.

Kirke-Smit kelgusida bunday holatlarning oldini olish maqsadida shifokorlarning kasbiy standartlarini o‘zgartirish bo‘yicha shikoyat yo‘llagan.