Yaponiyaning Ogiri Printing kompaniyasi qorinning g‘uldurashi sabab noqulay vaziyatda qolmaslikni istovchilar uchun bloknot yaratdi. Bloknot jamlanmasidan yesa bo‘ladigan qahvali siyohga ega ruchka ham o‘rin olgan, deb xabar beradi Sora News 24.
Bloknotdan qorinning g‘uldurashini yashirish yoki uni iste’mol qilish orqali ikki xil usulda foydalanish mumkin.
Agarda siz qorningiz g‘uldurashini sezsangiz va uni atrofdagilar eshitishini xohlamasangiz, kerakli vaqtda bloknotni keskin ochish kerak. Gap shundaki, bloknot muqovasi maxsus lenta bilan qotirilgan bo‘lib, uni ochganda 97 detsibelli baland ovoz chiqadi. Taqqoslash uchun ishlayotgan gazonokosilkaning ovozi 90 detsibelga teng.
Ixtirochilarning ta’kidlashicha, bu kabi keskin ovoz qorindan chiqadigan yoqimsiz tovushdan atrofdagilarni chalg‘itadi.
Ishonchli chiqishi uchun bloknotning bir-ikki varag‘ini yeyish ham mumkin — u iste’molga yaroqli. Bloknot qog‘ozi neytral ta’mga ega. Shu sababli jamlanmadagi maxsus ruchkani ham olish va yeyishdan oldin varaqqa biror nima yozish tavsiya etiladi. Ruchaning ichidagi siyoh qahva ta’miga ega bo‘lib, u ham iste’molga yaroqli hisoblanadi.
Izoh (0)