Qozog‘istonda koronavirusga chalinganlar soni 16 351 kishiga, Qirg‘izistonda esa 2789 kishiga yetdi

Qozog‘istonda o‘tgan bir sutka ichida yana 474 kishida koronavirus aniqlandi, deb xabar beradi Tengrinews.

Mamlakat bo‘ylab kasallar sonining ortishi 3 foizni tashkil etmoqda. Koronavirusga chalinish bo‘yicha yangi holatlar quyidagi hududlarda aniqlangan:

• Nur-Sulton shahri — 103 (3,4 foiz);
• Qarag‘anda viloyati — 57 (3,4 foiz);
• Olmaota shahri — 41 (1,3 foiz);
• Chimkent shahri — 37 (3,1 foiz);
• Sharqiy Qozog‘iston viloyati — 35 (11,7 foiz);
• Turkiston viloyati — 32 (6,6 foiz);
• Jambil viloyati — 29 (5,5 foiz);
• G‘arbiy Qozog‘iston viloyati — 28 (2,7 foiz);
• Aqto‘be viloyati — 27 (4,8 foiz);
• Aqmo‘la viloyati — 20 (8,3 foiz);
• Atirau viloyati — 17 (1,2 foiz);
• Shimoliy Qozog‘iston viloyati — 12 (9 foiz);
• Kostanay viloyati — 11 (4,5 foiz);
• Qizilo‘rda viloyati — 11 (2,1 foiz);
• Olmaota viloyati — 9 (1,7 foiz);
• Mang‘istov viloyati — 5 (1,2 foiz).

Butun mamlakat bo‘ylab koronavirusga chalinganlar soni 16 351 kishiga yetgan. Hozirga qadar 10 139 kishi sog‘aygan, 105 kishi virus qurboniga aylangan. Shuningdek, 7609 kishi koronavirusni belgisiz tashuvchi sifatida qayd etilgan.Qirg‘izistonda 19-iyun holatiga ko‘ra, yana 132 kishida koronavirus infeksiyasi aniqlandi. Bu haqda mamlakat Sog‘liqni saqlash vazirligiga tayanib, Kloop xabar berdi.

Koronavirusga chalingan yangi kasallarning 48 nafari Bishkek shahri hisobiga to‘g‘ri kelmoqda. Shuningdek, quyidagi hududlarda ham koronavirus bilan kasallanish bo‘yicha yangi holatlar qayd etilgan:

• Chuy viloyati — 38;
• O‘sh shahri — 13;
• O‘sh viloyati — 12;
• Talas viloyati — 4;
• Norin viloyati — 6;
• Jalolobod viloyati — 11.

Kasallanish bo‘yicha yangi qayd etilgan holatlar orasida 8 nafar tibbiyot xodimi ham bor.

Butun mamlakat bo‘ylab COVID-19 bilan kasallanganlar soni 2789 kishiga yetdi, ularning 32 nafari virus qurboniga aylangan. Hozirga qadar 1961 nafar bemor davolanishga muvaffaq bo‘lgan.

Afg‘onistonda o‘tgan bir sutka ichida yana 658 kishida koronavirus aniqlandi, deb xabar beradi Tolo News.

Mamlakat Sog‘liqni saqlash vazirligining ma’lumotlariga ko‘ra, Afg‘onistonda koronavirusga chalinganlar soni 27 532 kishini tashkil etmoqda.

O‘tgan bir sutka davomida poytaxt Kobul shahrining o‘zida 415 kishida koronavirus aniqlangan.

Butun mamlakat bo‘ylab koronavirus oqibatida vafot etganlarning jami soni 546 kishiga yetdi, hozirga qadar 7660 bemor davolanishga muvaffaq bo‘ldi. O‘tgan bir sutkaning o‘zida 1502 kishi sog‘aygan, hozirga qadar Afg‘onistonda koronavirusga qarshi 61,6 mingdan ortiq test o‘tkazilgan.

Tojikistonda koronavirus bilan kasallanganlar soni 5279 kishiga yetdi, deb xabar beradi “RIA Novosti”. O‘tgan sutka davomida yana 68 kishida koronavirus aniqlangan.

Mamlakatda o‘tgan bir sutka ichida 62 kishiga shifoxonadan javob berilgan bo‘lib, hozirda Tojikistondagi tibbiyot muassasalarida 248 kishi davolanmoqda.

Mamlakatda hozirga qadar 51 kishi COVID-19 qurboniga aylangan, 3762 bemor davolanishga muvaffaq bo‘lgan.

O‘zbekistonda 19-iyun soat 10:00 holatiga ko‘ra, koronavirusga chalinganlarning umumiy soni 5855 nafarga yetdi. Mamlakatda infeksiyadan sog‘ayganlar soni 4199 nafarni (71 foiz) tashkil etmoqda. COVID-19 koronavirusi O‘zbekiston hududiga kirib kelganidan buyon jami 19 nafar bemor mazkur infeksiya asoratlari oqibatida hayotdan ko‘z yumgan.