“O‘zgidromet” xabariga ko‘ra, Turkmaniston hududidan kirgan issiq havo natijasida so‘nggi kunlarda kuzatilgan salqinlik 19-iyundan asta-sekin chekinadi.
Respublikaning markaziy va sharqiy mintaqalarida havo 33-35 darajagacha isiydi. Bunday harorat bu kun uchun xos bo‘lgan me’yoriy ko‘rsatkichlarga yaqindir. Shimoliy, janubiy va cho‘l zonalarida issiq havo kuchliroq bo‘lib, harorat 38-40 darajaga yetadi, bu esa me’yordan 2-4 darajaga yuqoridir.
Haftaning oxiri va keyingi haftaning boshida issiq O‘zbekistonning butun hududini qamrab oladi. Ayniqsa, yakshanba va dushanbada issiq bo‘ladi. Shu kunlarda havo harorati 39-42 darajagacha, janubiy viloyatlarda va Navoiy, Buxoro viloyatlarining cho‘l zonasida 43-44 darajagacha ko‘tariladi. Bu o‘rtacha ko‘p yillik qiymatlardan 5-8 darajaga yuqoridir.
Issiq havoning kirishi shamolning tezligi sekundiga 15-20 metrgacha kuchayishi bilan birga kuzatiladi.
Xabarda ta’kidlanishicha, eng issiq iyunlarda Toshkentda oyning oxirgi o‘n kunligi boshida havo harorati 42-43 darajaga yetgan.
Izoh (0)