Ijtimoiy tarmoqlarda Surxondaryo viloyati Sariosiyo tumanida 13-iyun kuni Milliy gvardiya harbiylari ko‘chada niqobsiz holda otasi bilan gaplashib turgan 24 yoshli yigitni niqob taqmagani uchun avtobusga olib chiqmoqchi bo‘lgani va shu paytda harbiylardan biri yigitni bo‘g‘ib, hushidan ketkizgani haqida xabar tarqaldi.
Xabarda aytilishicha, 24 yoshli Dovar Jo‘raqulov o‘z uyining darvozasi oldida 49 yoshli otasi Muhammadjon Rajabov bilan gaplashib turgan vaqtida niqobini pastga tushirgan. Shu vaqtda Milliy gvardiya harbiylari ularning oldiga kelgan va yigit niqob taqmagani uchun uni avtobusga olib chiqmoqchi bo‘lgan. Yigit bunga qarshilik qilayotganda, harbiylardan biri uni bo‘g‘gan va yigit hushidan ketgan. Shundan so‘ng yig‘itning ota-onasi uni kasalxonaga olib borgan. Xabarga ilova qilingan rasm va ma’lumotnomaga ko‘ra, shifokorlar yigitga umurtqa qon tomirlarining qisilish tashxisini qo‘ygan.
Milliy gvardiya axborot xizmati mazkur xabarga izoh berdi. Ushbu holat yuzasidan Milliy gvardiya Surxondaryo viloyati bo‘yicha boshqarmasi xabar berishicha, joriy yilning 13-iyun kuni soat taxminan 15:00 da Milliy gvardiya Surxondaryo viloyati bo‘yicha boshqarmasi harbiy xizmatchilari M.Niyozov va A.Fayzullayev hamda viloyat IIB xodimlari hamkorlikda Sariosiyo tumanida karantin qoidalariga rioya qilinishi bo‘yicha reyd tadbiri o‘tkazgan. Reyd vaqtda Sariosiyo tumani “Lutfkor” mahallasida yashovchi 1995-yilda tug‘ilgan Dovar Jo‘raqulov yuziga niqob taqmagan holda 2 nafar sherigi bilan suhbatlashib turgani aniqlangan.
Ta’kidlanishicha, bu holatni ko‘rgan Milliy gvardiya va viloyat IIB xodimlari ularga karantin qoidalariga rioya qilish lozimligi tushuntirib ogohlantirganda, fuqaro Dovar Jo‘raqulov xodimlarga o‘zini tanishtirishdan bosh tortgan. Shu bilan birga, mazkur fuqaro qoidabuzarlik sodir etganligini tan olmagan. Huquqni muhofaza qilish organlari xodimlariga nisbatan qo‘pol muomalasi uchun uning tuman IIBga borishi tushuntirilganda esa fuqaro faol jismoniy qarshilik ko‘rsatib, borishdan bosh tortgan.
Shundan so‘ng, Milliy gvardiya va viloyat IIB xodimlari Dovar Jo‘raqulovni avtobusga chiqarmoqchi bo‘lganda, u qarshilik ko‘rsatishni davom ettirib, avtobus zinasiga yotib olgan. Shu payt uning otasi Muhammad Rajabov avtobus zinasida qarshilik qilayotgan o‘g‘lining oyog‘idan tortib, uni avtobusdan tushirib olishga harakat qilgan va xodimlar bilan baland ovozda janjallashib, o‘g‘lini o‘zi bilan uyiga olib kirib ketgan.
Qayd etilishicha, mazkur holat bo‘yicha Milliy gvardiya va IIB xodimlari Sariosiyo tumani ichki ishlar bo‘limiga borib, mutasaddi rahbarlarga ma’lumot bergan va ushbu fuqaroning xatti-harakatlari yuzasidan qonuniy chora ko‘rilishini so‘rab, yozma murojaat qoldirgan.
“Hozirda Milliy gvardiya harbiy xizmatchilarining bildirgisiga asosan, Sariosiyo tumani IIB xodimlari tomonidan tekshiruv harakatlari olib borilmoqda. Shuningdek, Dovar Jo‘raqulovning O‘zbekiston Respublikasi Prezidentiga portal orqali qilgan murojaati yuzasidan Sariosiyo tumani prokuraturasi tomonidan tergovga qadar tekshiruv harakatlari olib borilmoqda”, — deyiladi izohda.
Ta’kidlanishicha, Milliy gvardiya Surxondaryo viloyati bo‘yicha boshqarmasi harbiy xizmatchilari M.Niyozov va A.Fayzullayevning xatti-harakatlariga intizomiy baho berish yuzasidan xizmat tekshiruvi tayinlangan.
Avvalroq ijtimoiy tarmoqlarda Nukus shahrida ichki ishlar organi xodimi hamda Milliy gvardiya harbiy xizmatchisi bir fuqaroni majburlab “Gazel”ga ortishga uringani tasvirlangan video tarqalgandi, Ichki ishlar vazirligi mazkur fuqaro niqob taqmagani va karantin qoidalariga amal qilmagani sababli u bilan suhbat o‘tkazishga urinish chog‘ida qarshilik ko‘rsatgani va natijada mazkur holat yuzaga kelganini ma’lum qilgandi.
Eslatib o‘tamiz, Andijon shahar IIO FMB 4-son IIB xodimlari fuqaro A.A.ni IIB ma’muriy binosiga olib kelib, qiynoqqa solganligi oqibatida fuqaro 11-iyun kuni Respublika shoshilinch tez tibbiy yordam markazi Andijon filialida vafot etgan. Mazkur holat yuzasidan Andijon shahar IIO FMB 4-son IIB xodimlariga nisbatan Jinoyat kodeksining 206-moddasi (Hokimiyat yoki mansab vakolati doirasidan chetga chiqish) 1-qismi va boshqa moddalari bilan jinoyat ishi qo‘zg‘atilgan va 3 nafar IIB xodimi hibsga olindi. Mazkur voqea ortidan besh kishi, shu jumladan, Andijon shahar IIO FMB boshlig‘i ishdan olindi, 19 kishi jazolandi. Mazkur holat Inson huquqlari bo‘yicha Milliy markazi tomonidan qoralandi, “Yuksalish” umummilliy harakati va deputatlar bu holatga o‘z munosabatlarini bildirdi.
Izoh (0)