Ижтимоий тармоқларда Сурхондарё вилояти Сариосиё туманида 13 июнь куни Миллий гвардия ҳарбийлари кўчада ниқобсиз ҳолда отаси билан гаплашиб турган 24 ёшли йигитни ниқоб тақмагани учун автобусга олиб чиқмоқчи бўлгани ва шу пайтда ҳарбийлардан бири йигитни бўғиб, ҳушидан кеткизгани ҳақида хабар тарқалди.
Хабарда айтилишича, 24 ёшли Довар Жўрақулов ўз уйининг дарвозаси олдида 49 ёшли отаси Муҳаммаджон Ражабов билан гаплашиб турган вақтида ниқобини пастга туширган. Шу вақтда Миллий гвардия ҳарбийлари уларнинг олдига келган ва йигит ниқоб тақмагани учун уни автобусга олиб чиқмоқчи бўлган. Йигит бунга қаршилик қилаётганда, ҳарбийлардан бири уни бўғган ва йигит ҳушидан кетган. Шундан сўнг йиғитнинг ота-онаси уни касалхонага олиб борган. Хабарга илова қилинган расм ва маълумотномага кўра, шифокорлар йигитга умуртқа қон томирларининг қисилиш ташхисини қўйган.
Миллий гвардия ахборот хизмати мазкур хабарга изоҳ берди. Ушбу ҳолат юзасидан Миллий гвардия Сурхондарё вилояти бўйича бошқармаси хабар беришича, жорий йилнинг 13 июнь куни соат тахминан 15:00 да Миллий гвардия Сурхондарё вилояти бўйича бошқармаси ҳарбий хизматчилари М.Ниёзов ва А.Файзуллаев ҳамда вилоят ИИБ ходимлари ҳамкорликда Сариосиё туманида карантин қоидаларига риоя қилиниши бўйича рейд тадбири ўтказган. Рейд вақтда Сариосиё тумани «Лутфкор» маҳалласида яшовчи 1995 йилда туғилган Довар Жўрақулов юзига ниқоб тақмаган ҳолда 2 нафар шериги билан суҳбатлашиб тургани аниқланган.
Таъкидланишича, бу ҳолатни кўрган Миллий гвардия ва вилоят ИИБ ходимлари уларга карантин қоидаларига риоя қилиш лозимлиги тушунтириб огоҳлантирганда, фуқаро Довар Жўрақулов ходимларга ўзини таништиришдан бош тортган. Шу билан бирга, мазкур фуқаро қоидабузарлик содир этганлигини тан олмаган. Ҳуқуқни муҳофаза қилиш органлари ходимларига нисбатан қўпол муомаласи учун унинг туман ИИБга бориши тушунтирилганда эса фуқаро фаол жисмоний қаршилик кўрсатиб, боришдан бош тортган.
Шундан сўнг, Миллий гвардия ва вилоят ИИБ ходимлари Довар Жўрақуловни автобусга чиқармоқчи бўлганда, у қаршилик кўрсатишни давом эттириб, автобус зинасига ётиб олган. Шу пайт унинг отаси Муҳаммад Ражабов автобус зинасида қаршилик қилаётган ўғлининг оёғидан тортиб, уни автобусдан тушириб олишга ҳаракат қилган ва ходимлар билан баланд овозда жанжаллашиб, ўғлини ўзи билан уйига олиб кириб кетган.
Қайд этилишича, мазкур ҳолат бўйича Миллий гвардия ва ИИБ ходимлари Сариосиё тумани ички ишлар бўлимига бориб, мутасадди раҳбарларга маълумот берган ва ушбу фуқаронинг хатти-ҳаракатлари юзасидан қонуний чора кўрилишини сўраб, ёзма мурожаат қолдирган.
«Ҳозирда Миллий гвардия ҳарбий хизматчиларининг билдиргисига асосан, Сариосиё тумани ИИБ ходимлари томонидан текширув ҳаракатлари олиб борилмоқда. Шунингдек, Довар Жўрақуловнинг Ўзбекистон Республикаси Президентига портал орқали қилган мурожаати юзасидан Сариосиё тумани прокуратураси томонидан терговга қадар текширув ҳаракатлари олиб борилмоқда», — дейилади изоҳда.
Таъкидланишича, Миллий гвардия Сурхондарё вилояти бўйича бошқармаси ҳарбий хизматчилари М.Ниёзов ва А.Файзуллаевнинг хатти-ҳаракатларига интизомий баҳо бериш юзасидан хизмат текшируви тайинланган.
Аввалроқ ижтимоий тармоқларда Нукус шаҳрида ички ишлар органи ходими ҳамда Миллий гвардия ҳарбий хизматчиси бир фуқарони мажбурлаб «Газел»га ортишга урингани тасвирланган видео тарқалганди, Ички ишлар вазирлиги мазкур фуқаро ниқоб тақмагани ва карантин қоидаларига амал қилмагани сабабли у билан суҳбат ўтказишга уриниш чоғида қаршилик кўрсатгани ва натижада мазкур ҳолат юзага келганини маълум қилганди.
Эслатиб ўтамиз, Андижон шаҳар ИИО ФМБ 4-сон ИИБ ходимлари фуқаро А.А.ни ИИБ маъмурий биносига олиб келиб, қийноққа солганлиги оқибатида фуқаро 11 июнь куни Республика шошилинч тез тиббий ёрдам маркази Андижон филиалида вафот этган. Мазкур ҳолат юзасидан Андижон шаҳар ИИО ФМБ 4-сон ИИБ ходимларига нисбатан Жиноят кодексининг 206-моддаси (Ҳокимият ёки мансаб ваколати доирасидан четга чиқиш) 1-қисми ва бошқа моддалари билан жиноят иши қўзғатилган ва 3 нафар ИИБ ходими ҳибсга олинди. Мазкур воқеа ортидан беш киши, шу жумладан, Андижон шаҳар ИИО ФМБ бошлиғи ишдан олинди, 19 киши жазоланди. Мазкур ҳолат Инсон ҳуқуқлари бўйича Миллий маркази томонидан қораланди, «Юксалиш» умуммиллий ҳаракати ва депутатлар бу ҳолатга ўз муносабатларини билдирди.
Изоҳ (0)