“Barselona”ning urugvaylik markaziy himoyachisi Ronald Arauxo faoliyatini Angliya Premyer Ligasida davom ettirishi mumkin. Bu haqda Ispaniyaning Fichajes nashri xabar bermoqda.
Manbaning yozishicha, “Liverpul” klubi 26 yoshli himoyachiga jiddiy qiziqish bildirmoqda. Angliya Superkubogi doirasidagi “Kristal Pelas”ga qarshi kechgan uchrashuvdagi mag‘lubiyatdan so‘ng, mersisaydliklar himoya chizig‘ini kuchaytirishni maqsad qilgan. Klub hozirda Arauxoning holatini diqqat bilan kuzatmoqda va uning uchun 60 million yevro to‘lashga tayyor.
Avvalroq Ronald “Barselona”da qolishni istashini bildirgan bo‘lsa-da, Premyer Ligada o‘ynash istagi uni fikrini o‘zgartirishi mumkin. Bundan tashqari, o‘tgan mavsumda himoyachi asosiy tarkibdagi o‘rnini yo‘qotgan. Bu ham futbolchining qaroriga ta’sir qilish ehtimoli mavjud.
Kataloniyaliklar esa futbolchiga jiddiy taklif tushsa, uning ketishiga qarshi emas. Chunki jamoaning himoya chizig‘ida raqobat kuchli. Qolaversa, klub moliyaviy feyr-pley sabab yangi futbolchilarini ro‘yxatdan o‘tkaza olmayapti. Arauxoning transferi klub byudjetini tiklashda yordam berishi mumkin.
Hozircha tomonlar o‘rtasida rasmiy muzokaralar boshlanmagan, ammo manbaga ko‘ra, “Liverpul” yaqin kunlarda rasmiy taklif yuborishi kutilmoqda.
- 2024/25-yilgi mavsumda Arauxo “Barselona” safida 25 ta o‘yinda maydonga tushib, 2 ta gol va 2 ta assist qayd etdi.
- Uning kataloniyaliklar bilan amaldagi shartnomasi 2031-yil yozigacha davom etadi.
- Transfermarkt portali himoyachining narxini 30 million yevro deb baholagan.
Izoh (0)