«Кимдир менинг топшириғим билан ҳаракат қилса, у буни бажаради». Рамзан Қодиров грузиялик журналистга уюштирилган ҳужум ҳақида

Чеченистон раҳбари Рамзан Қодиров Россия президенти Владимир Путинни ҳақорат қилган грузиялик журналист Георгий Габунияни ўлдиришни буюртма қилгани тўғрисидаги айбловга изоҳ берди.

«Айтишларича, бу сафар Қодировнинг буюртмаси билан грузиялик журналистни ўлдирмоқчи бўлган ёлланма қотилни қўлга олишибди. Жаноблар, ишонинг, кимдир менинг буйруғим билан ҳаракат қилса, у, албатта, вазифани бажаради. Агарда топшириқни овоз қилмай бажариш керак бўлса, ҳеч ким, айниқса, турғунликда қолиб кетган мамлакатларингиз бундан хабар топмайди», — деб ёзади Қодиров ўзининг Telegram каналига.

Шунингдек, у Габуния томонидан билдирилган ҳақоратни унутмаганини ҳам таъкидлаб ўтган.

«Георгий Габуния, аввал ҳам айтганимдек, тиз чўкиб, кечирим сўрагани яхши… У бир кишини эмас, бутун россияликларни ҳақорат қилди. Грузия ҳукуматидан ушбу фуқарони қайта тарбиялаш борасида чора кўришларини сўрайман. Унга тўғри хулоса чиқариш ва ақлини йиғиб олишини тавсия қиламан. Акс ҳолда, қайтараман, у менинг душманимга айланади», — дейди Чеченистон раҳбари.

Эслатиб ўтамиз, «Рустави 2» канали бошловчиси Георгия Габуния 2019 йил июль бошида эфир вақтида Россия президенти Владимир Путинни ҳақорат қилган эди. У икки ойга эфирдан четлатилган, аммо ишдан бўшатилмаган эди. Кейинроқ Рамзан Қодиров Габуния телебошловчини огоҳлантирган эди.