2020-yil 15-iyundan boshlab “sariq” va “yashil” toifalarga ajratilgan hududlar o‘rtasida sanitariya-gigiyena qoidalariga qat’iy rioya etgan holda 7 ta yo‘nalishda poyezdlar qatnovini qayta tiklashga ruxsat berildi. Bu haqda “O‘zbekiston temiryo‘llari” kompaniyasining matbuot xizmati xabar bermoqda.
Xabarga ko‘ra, “O‘ztemiryo‘lyo‘lovchi” aksiyadorlik jamiyati ruxsat berilgan yo‘nalishlar bo‘yicha bosqichma-bosqich poyezdlar qatnovini yo‘lga qo‘yishni boshlagan.
Harakat jadvaliga ko‘ra:
15-iyundan boshlab Toshkent—Termiz—Toshkent yo‘nalishidagi 80/79-raqamli yo‘lovchi poyezdlari soat 19:30 da Toshkent janubiy vokzali hamda soat 18:57 da Termiz vokzalidan yura boshlagan;
Toshkent—Nukus—Toshkent yo‘nalishidagi 54/53-raqamli yo‘lovchi poyezdlari soat 14:16 da Toshkent janubiy vokzali hamda soat 16:12 da Nukus vokzalidan harakatlangan;
Toshkent—Xiva—Toshkent yo‘nalishidagi 56/55-raqamli yo‘lovchi poyezdlari soat 21:00 da Toshkent Janubiy vokzali hamda soat 16:05 da Xiva vokzalidan har kuni harakatni amalga oshiradi.
Shuningdek, Toshkent—Samarqand—Toshkent yo‘nalishi bo‘yicha sanitariya-epidemiologik talablarga qat’iy rioya etgan holda “Afrosiyob” poyezdlarining qatnovlari ham yo‘lga qo‘yilgan.
Kompaniya matbuot xizmatining qayd etishicha, harakati qayta tiklangan poyezdlarga chiqishda yo‘lovchilar orasida o‘rnatilgan tartib-qoidalarga, vokzallar hamda sanitariya-epidemiologiya markazi xodimlarining talablariga bo‘ysunmaslik holatlari ham uchragan.
“Fursatdan foydalanib, barcha yo‘lovchilardan sanitariya-epidemiologik talablarga qat’iy rioya qilishlarini so‘raymiz. Agar o‘zimizni himoya qilib, gigiyena qoidalariga rioya qilib, pandemiyaga qarshi birgalikda kurashsak, poyezdlarimiz qatnovi, xizmat ko‘rsatish hech qachon to‘xtamaydi”, — deyiladi bayonotda.
Mavzuga doir:
Izoh (0)