AOKA huzuridagi shtabda Transport vazirligi matbuot xizmati rahbari Navro‘z Ashurmatov ishtirokida brifing o‘tkazilib, Respublika maxsus komissiyasi tomonidan tasdiqlangan karantin davrida mahalliy yo‘nalishlarda avia va temiryo‘l qatnovlarini yo‘lga qo‘yishning vaqtinchalik tartibi haqida ma’lumot berildi.

Mazkur tartibga muvofiq, avia va temiryo‘l reyslariga chiqish istagida bo‘lgan yo‘lovchilar koronavirus infeksiyasiga test topshirishi lozim. Bunda Sanitariya-epidemiologik osoyishtalik markazi tomonidan koronavirus infeksiyasiga test tahlillari olinganiga 120 soatdan ko‘p bo‘lmagan va tahlil natijasi manfiy ekani haqidagi ma’lumotnomaga ega bo‘lgan yo‘lovchilar reyslarga qo‘yiladi.

Barcha yo‘lovchilarning aeroport va temiryo‘l vokzallari hududiga kirishidan oldin tana harorati o‘lchanadi.

• Tana harorati 37 darajadan yuqori bo‘lmagan yo‘lovchilar dezinfektor yordamida zararsizlantiriladi hamda havo va temiryo‘l transportlariga bir martalik himoya niqoblari va qo‘lqoplarda kiritiladi;
• Tana harorati 37 darajadan yuqori bo‘lgan yo‘lovchilarga avia va temiryo‘l xizmatlaridan foydalanishga ruxsat berilmaydi. Bunday holatlarda yo‘lovchiga chipta puli belgilangan tartibda qaytarib beriladi.

Yo‘lovchilar aeroport va temiryo‘l vokzallarida ijtimoiy masofani saqlashlari hamda yo‘naltiruvchi maxsus tasmalar bo‘ylab harakatlanishlari shart.

Aeroport va temiryo‘l vokzallarida umumiy ovqatlanish, xizmat ko‘rsatish va savdo shoxobchalarining faoliyat yuritishiga yo‘l qo‘yilmaydi.

Yo‘lovchilar savdo avtomatlaridan foydalanishlari mumkin.

Yo‘lovchilar havo kemalariga va temiryo‘l vagonlariga ijtimoiy masofani saqlagan holda joylashtiriladi.

Avia va temiryo‘l qatnovlariga elektron chiptalar onlayn tarzda sotiladi.

Shuningdek, qatnov vaqtida quyidagi tartibga amal qilinadi:

• yo‘lovchilar qatnov vaqtida samolyot salonida va vagonlar bo‘ylab harakatlanishi taqiqlanadi (hojatxonadan foydalanish holatlari bundan mustasno);
• parvoz vaqtida yo‘lovchilarga faqatgina 250 ml hajmdagi qadoqlangan ichimlik suvlari beriladi — oziq-ovqat mahsulotlari, turli xil jurnal va gazetalar tarqatilmaydi (avariya holatidagi harakat yo‘riqnomasi bundan mustasno);
• poyezd vagonlarida yo‘lovchilarga berilgan bir martalik himoya niqoblari va qo‘lqoplarini yechishga ruxsat berilmaydi (yo‘lovchilarning suv ichish holatlari bundan mustasno);
• vagonlarning hojatxona hamda tamburlarida yo‘lovchilarning to‘planishlariga yo‘l qo‘yilmaydi;
• Yo‘lovchilar uchun hojatxonalar sanitariya va gigiyena vositalari, antiseptik vositalar bilan to‘liq ta’minlanadi.

Yo‘lovchilarning havo kemasi bortida va temiryo‘l vagonlarida joylashuvi ijtimoiy masofani saqlash tamoyili asosida quyidagi ko‘rinishda amalga oshiriladi:

Mazkur vaqtinchalik tartib talablari buzilishida aybdor bo‘lgan shaxslar epidemiyalarga qarshi kurash qoidalarini buzganlik uchun ma’muriy javobgarlikka tortiladi.

Eslatib o‘tamiz, Respublika maxsus komissiyasining 2020-yil 14-maydagi qarori bilan O‘zbekistonda karantin 1-iyungacha uzaytirildi, biroq temiryo‘l va aviaqatnovlar qisman qayta tiklanadi.