Sardoba toshqinidan zarar ko‘rgan 2 mingga yaqin uyni ta’mirlash ishlarida 15 mingdan ortiq ishchi mehnat qilmoqda

Sirdaryo viloyatining suv toshqinidan zarar ko‘rgan hududlaridagi qurilish-ta’mirlash ishlarida 15 mingdan ortiq ishchi qatnashmoqda. Bu haqda Favqulodda vaziyatlar vazirligi matbuot kotibi Murod Sodiqov ma’lum qildi.

“Hozirga qadar 15 468 ishchi va 757 transport vositalari jalb etilgan holda 1814 uyda ta’mirlash ishlari olib borilmoqda”, — dedi FVV vakili.

Uning qo‘shimcha qilishicha, toshqindan zarar ko‘rgan aholining band bo‘lmagan 1 122 nafari hududda olib borilayotgan qurilish va obodonlashtirish ishlariga jalb etilgan.

Eslatib o‘tamiz, 1-may kuni soat 05:55 da Sirdaryo viloyatida joylashgan Sardoba suv ombori to‘g‘onining 6-piket devorida suv chiqishi yuzaga kelgandi. Suv toshqini oqibatida 4435 ta xonadon talafot ko‘rgan. Ulardan 2390 tasi yaroqsiz holga kelgan, 2045 tasi esa ta’mirtalab holatda. Bosh prokuratura Sardoba falokati yuzasidan jinoyat ishi bo‘yicha 4 ta tergov versiyasini ko‘rib chiqmoqda. Hozirda suv ombori ishi bo‘yicha ikki kishi qamoqqa olingan. Sardoba tumani “Do‘stlik” mahallasida 37 ta 1480 xonadonli; Mirzaobod tumani “Haqiqat” mahallasida 20 ta 800 xonadonli va “Navbahor” mahallasida 9 ta 360 xonadonli ko‘p qavatli turar joy qurilish ishlari boshlangan.