Жаҳон соғлиқни сақлаш ташкилотининг соғлиқни сақлаш соҳасида фавқулодда вазиятлар бўйича дастури директори Майкл Райаннинг маълум қилишича, Россияда коронавирус оқибатида юзага келаётган ўлим даражасининг пастлигини «тушуниш қийин». Бу ҳақда Meduza хабар берди.
«Албатта, ўлимлар сонининг касалланганлар сонига нисбатан жуда пастлиги ноодатий», — дея таъкидлаган Райан. Унинг қайд этишича, Россия аҳолисининг ўртача ёши ва соғлиқни сақлаш тизими ўлим даражаси юқори бўлган Европа мамлакатларидан кўп фарқ қилмайди.
Райаннинг таъкидлашича, турли мамлакатлар коронавирусдан юзага келадиган ўлим статистикасини турлича ҳисоблайди. Баъзи давлатлар бу статистикага барча касалланганларни қўшади. Бу эса, агар ўлимнинг асосий сабаби коронавирус бўлмаса, статистиканинг ошиб кетишига олиб келиши мумкин.
Шунингдек, Россияда COVID-19 билан касалланиш ҳолатлари сонининг юқорилиги фонида ўлим даражасининг пастлиги кенг миқёсда тест ўтказилгани билан боғлиқ бўлиши мумкин. «Россия ҳукумати ўлимларни ҳисоблаш ёндашувини таҳлил қилгани ва уни тўғри олиб бораётганига ишонч ҳосил қилгани муҳим ҳисобланади», — дея фикрини билдирган Райан.
10 июнь маълумотларига кўра, Россияда 493 657 кишида коронавирус аниқланган, улардан 6358 киши вафот этган. Касалланганлар сони бўйича Россия дунёда учинчи ўринда, ўлимлар сони бўйича эса 13-ўринда турибди.
Financial Times ва The New York Times Россияда коронавирус қурбонлари сони камайтириб кўрсатилганини тахмин қилган. Россия ҳукумати статистика ўзгартирилмаганини маълум қилган. Россия президенти матбуот котиби Дмитрий Песков ўлим даражасининг пастлигини Россия соғлиқни сақлаш тизимининг самарадорлиги билан изоҳлаган.
Meduza томонидан ўтказилган ўрганишлар хулосасига кўра, ўлимларни ҳисоблашнинг амалдаги усули ҳудудлардаги мансабдорларга COVID-19 оқибатида юзага келган ўлимларни онгли равишда яширишга имкон беради.
Аввалроқ COVID-19’дан вафот этганлар сони дунё миқёсида 400 минг нафардан ошиб кетгани ҳақида хабар берилганди.
Изоҳ (0)