Zelenskiy xalqni qo‘llab-quvvatlash uchun koronavirus bilan kasallanishga ham rozi ekanini ta’kidladi

Ukraina prezidenti Vladimir Zelenskiy koronavirusdan qo‘rqmasligi va ukrainaliklar COVID-19’dan qo‘rqmasligi uchun hatto o‘z misolida kasallikni yengib, namuna bo‘lishga ham tayyorligini qayd etdi, deb yozmoqda “Interfaks”.

“Ushbu sinovni boshimdan o‘tkazishni istayman. Bu orqali odamlarning og‘irini yengil qilgan bo‘lardim. Tushkunlik davrida o‘zimizga kela olganmiz. Xalqimga: ‘Keling, men kasal bo‘laman va Bankovoyga karantinga joylashtirasiz. U yerda yashayveraman, axir sharoit yaxshi-ku’, deb aytdim”, — degan Zelenskiy Xmelnitsk viloyatiga qilgan tashrifi chog‘ida “Ukrainskaya pravda” nashriga bergan intervyusida.

“Odamlar koronavirusning qanchalik dahshatli ekanini tushunishi uchun kasal bo‘lib ko‘rishi va buning qanchalik og‘ir ekanini his etishi lozim. Men buni o‘zimdan o‘tkazib, barchaga ko‘rsata olaman. Bu odamlarning COVID-19 vabo emasligini tushunishi, tushkunlikka tushmasligi uchun saboq bo‘lardi. Epidemiya boshida hamma qattiq qo‘rqib ketdi va o‘lim muqarrar deya o‘ylay boshladi”, — deya fikr bildirgan Zelenskiy.

Zelenskiy ushbu g‘oyadan voz kechgani va bu biroz oshirib yuborish bo‘lishini ta’kidlagan.

“Bunday qilish qiyin emasdi, ammo oilam ushbu ish uchun meni kechirmasligi mumkin edi. Jinniga ham chiqarishardi. Umuman olganda, shunga yaqin holat yuzaga kelardi”, — deya qo‘shimcha qilgan u.

Ukrainada 9-iyun holatiga ko‘ra, 27 856 nafar kishi COVID-19 koronavirus infeksiyasiga chalingan. 12 412 kishi kasallikdan tuzalgan, 810 nafar bemor vafot etgan.