2020-yil 4-iyun kuni Xorazm viloyatining ayrim hududlarida kuchli shamol esishi kuzatilib, uning tezligi ba’zi joylarda 65-70 km/soatni tashkil qilgan. Bu haqda “Xorazm hududiy elektr tarmoqlari” korxonasi xabar bergan.
Xabarga ko‘ra, shamol asosan Hazorasp, Gurlan, Shovot, Bog‘ot, Xonqa tumanlarida nisbatan kuchliroq bo‘lib, xonadonlarning yengil konstruksiyali tomlariga zarar yetkazgan. Bundan tashqari elektr simyog‘ochlari qo‘porilib, elektr tarmoqlari qattiq shikastlangan.
Gurlan tumanining “Paxtakor” mahallasida uylar tomi elektr tarmoqlari ustiga tushishi oqibatida 0,4 kilovattli elektr tarmog‘i, 2277, 2041, 2046-sonli transformatorlarga shikast yetgan. Shovot tumani Bo‘yrachi qishlog‘idagi 6054, 6351, 6066, 6041-sonli transformatoridan o‘tgan 0,4 kilovattlik havo tarmoqlarida ham avariya yuz bergan.
“Xorazm hududiy elektr tarmoqlari” AJ tomonidan tabiiy ofat oqibatlarini bartaraf etish bo‘yicha barcha zarur chora-tadbirlar ko‘rilib, xodimlar va texnika resurslari elektr ta’minotini tiklash ishlariga jalb qilingan, deyiladi xabarda.
Mavzuga doir: Xorazmda yana kuchli shamol kuzatildi: tomlar uchib ketgan, ko‘plab daraxt va simyog‘ochlar qulagan (foto)
Izoh (0)