AQShda so‘nggi 25 yildan buyon birinchi bor barcha federal qamoqxonalar yopildi. Mazkur qaror politsiya tomonidan qo‘lga olinganidan so‘ng, vafot etgan afro-amerikalikning o‘limi sabab yuzaga kelgan tartibsizliklar fonida qabul qilindi. Bu haqda AQSh Qamoqxonalar byurosining xatiga tayanib, Government Executive xabar berdi.
“Byuro butun mamlakat bo‘ylab davom etayotgan vahima va tartibsizliklar sabab soat 16:00 dan (Toshkent vaqti bilan 2-iyul soat 01:00) milliy lokdaun (o‘ta qattiq rejim) joriy etdi”, — deyiladi xabarda.
Byuro o‘z xatida 165,5 mingga yaqin mahbus saqlanadigan 122 ta axloq tuzatish muassasalarini sanab o‘tgan. Ushbu qamoqxonalardagi jami xodimlar qariyb 37 ming kishini tashkil etadi. Idoraning ta’kidlashicha, bu kabi choralar mahbuslar va ishchilar xavfsizligini ta’minlash maqsadida joriy etilmoqda. Lokdaun mamlakatdagi tartibsizliklar tinchimaguncha davom etadi.
Bundan ikki oy oldin byuro koronavirus tarqalishining oldini olish maqsadida qisman bloklashni amalga oshirgandi. O‘shanda mahbuslarga 14 kun davomida kameralardan chiqmaslik buyurilgan. Ularga kir yuvish, yuvinish xonalarida, kompyuter zonalarida va uchrashuv xonalarida ommaviy to‘planish taqiqlangan. Shuningdek, ta’lim dasturlari va davolanish mashg‘ulotlariga qatnash oldingi rejimda qolavergan. Bundan tashqari, 22-maydan boshlab Amerika qamoqxonalarida yengil jinoyat sodir etganlarni qo‘yib yuborish boshlangan.
Janubi-sharqiy mintaqadagi Qamoqxona kengashi vitse-prezidenti Jo Roxasning so‘zlariga ko‘ra, hukumat to‘liq lokdaunni so‘nggi bor 1995-yili amalga oshirgan. O‘sha vaqtda bunga Talladega (Alabama shtati), Allenvud (Pensilvaniya), Memfis (Tennessi) va Grinvillda (Illinoys) joylashgan axloq tuzatish muassasalaridagi tartibsizliklar sabab bo‘lgan. Norozilikka kongressda hukumatning giyohvand moddalarga oid jinoyatlarni qisqartirishdan bosh tortishiga ovoz berilgani sabab bo‘lgani taxmin qilingan.
Mavzuga doir: Tramp Oq uy qarshisida sodir bo‘lgan norozilik namoyishi vaqtida yerosti bunkeriga berkingani ma’lum bo‘ldi
Izoh (0)