Yer resurslari, geodeziya, kartografiya va davlat kadastri davlat qo‘mitasi “O‘zbekiston Respublikasidagi barcha suv omborlari, yirik suv havzalari va gidroelektr stansiyalarda suv zaxiralarini ushlab turuvchi to‘g‘onlar va devorlarning eroziyasi natijasida kelib chiqishi mumkin bo‘lgan favqulodda vaziyatlarni prognozlash to‘g‘risida”gi Vazirlar Mahkamasi qarori loyihasi muhokamaga qo‘ydi.
Unga ko‘ra, Yer resurslari, geodeziya, kartografiya va davlat kadastri davlat qo‘mitasi huzuridagi Davlat kadastrlari, geodeziya va kartografiya milliy markazi Favqulodda vaziyatlar vazirligi, Suv xo‘jaligi vazirligi va Energetika vazirligi va Davlat geologiya va mineral resurslar qo‘mitasi bilan birgalikda 2020-yil 1-oktabrga qadar geodezik o‘lchovlar, zamonaviy kosmik suratlar hamda ular yordamida tayyorlangan yerning raqamli balandlik ma’lumotlaridan foydalangan holda respublikadagi barcha suv omborlari, yirik suv havzalari, gidroelektr stansiyalarida va boshqa suv toshqini kelib chiqishi mumkin bo‘lgan suv obyektlarining suv sig‘imidan kelib chiqqan holda olinadigan hisobiy radiusdagi relyefli xaritasini ishlab chiqadi va tegishli idoralarning hududiy boshqarmalariga taqdim etilishini ta’minlaydi.
Yer resurslari, geodeziya, kartografiya va davlat kadastri davlat qo‘mitasi huzuridagi Davlat kadastrlari, geodeziya va kartografiya milliy markazi Axborot texnologiyalari va kommunikatsiyalarini rivojlantirish vazirligi, Favqulodda vaziyatlar vazirligi, Suv xo‘jaligi vazirligi bilan birgalikda 2020-yil 15-noyabrga qadar katta sig‘imli suv obyektlarida to‘g‘onlar va devorlarning eroziyasi natijasida kelib chiqishi mumkin bo‘lgan favqulodda vaziyatlar natijasida o‘pirib chiqadigan suv oqimining yo‘nalishi va shunga mos ravishda suv ostida qoladigan yer maydonlarining kompyuter modulini ishlab chiqadi.
Shuningdek, Suv xo‘jaligi vazirligi, Yer resurslari, geodeziya, kartografiya va davlat kadastri davlat qo‘mitasi, Davlat geologiya va mineral resurslar qo‘mitasi, “O‘zbekgidroenergo” AJ ikki oy muddatda suv omborlaridagi to‘g‘onlarni va yirik gidrotexnik inshootlarni mustahkamligi va turg‘unligi to‘g‘risida prognozlarni ishlab chiqish va aniqlash uchun davriy ravishda yuqori aniqlikdagi geodezik va geologik kuzatishlar olib borish rejasini ishlab chiqishi va o‘rnatilgan tartibda tasdiqlash uchun Vazirlar Mahkamasiga kiritilishi belgilangan.
Qaror ijrosini ta’minlashga qaratilgan “Yo‘l xaritasi” tasdiqlanadi. Qarorning bajarilishini nazorat qilish bosh vazir o‘rinbsari O‘ktam Barnoyev va Yer resurslari, geodeziya, kartografiya va davlat kadastri davlat qo‘mitasi raisi Abdushukur Abdullayev zimmasiga yuklatiladi.
Mavzuga doir: Sardoba suv omborini kim qurgan?
Izoh (0)