АҚШ президенти Дональд Трамп Crew Dragon фазо кемаси учирилганидан кейин мамлакатнинг тарихдаги энг буюк қуролларга эга бўлишини билдирди. «Коинотда иккинчи рақам бўлиб, Ерда етакчилик қилиб бўлмайди», деган у.
«Бутун дунё бизга ҳасад қилмоқда ва яқин орада биз Марсга одамларни чиқарамиз, шу тариқа АҚШ тарих ҳали кўрмаган буюк қуролларга эга бўлади», — дейди Трамп.
Унинг сўзларига кўра, АҚШ космосда «дунё етакчиси» мақомини қайтариб олган. SpaceX кемасининг учирилиши охирги «50 йил ичида қилинган биринчи космик мурожаат» ва «юлдузлар томон қўйилган ғалабали одим» бўлади, деган Трамп.
АҚШда «супер-пупер» ракеталарни яратиш ишлари бошланган ва улар мавжуд қуроллардан 17 бараварга кучли, деганди Трамп май ўрталарида мамлакат фазо кучларининг тантанали маросимида.
«Коинот мудофаа ва бошқа масалаларда АҚШнинг келажаги бўлади», — дея қўшимча қилган у.
2019 йил март ойида Трамп Ойга нима қилиб бўлса ҳам Америка астронавтларини юбориши лозимлигини қайд этган ва NASA’га беш йил ичида ўз буйруғини бажаришни топширган. 2020 йил февралида конгрессдан коинотга учадиган кемалар учун маблағ ажратишни сўраган ва АҚШнинг Ойда ва Марсда ўз байроғини тикадиган биринчи мамлакат бўлишини исташи ҳақида гапирганди.
30 майда Илон Маскнинг SpaceX компанияси астронавтларни коинотга учирган. Falcon 9 ракетаси Crew Dragon кемаси билан бирга Флорида штатидаги Кеннеди космик марказидаги майдончадан учирилган. Кема бортида астронавтлар Боб Бенкен ва Дуглас Хёрли Халқаро космик станцияга парвоз қилган.
АҚШ учун бу 2011 йили Space Shuttle дастури тугатилганидан сўнг мамлакатнинг ўз кемасида амалга оширилган илк бошқариладиган космик парвоздир.
Изоҳ (0)