Toshkentdagi elektr tarmoqlari korxonasi oldida “ijtimoiy masofalanish”ni yo‘qqa chiqargan navbatga izoh berildi

Toshkent shahrining Mirzo Ulug‘bek tumanidagi elektr tarmoqlari korxonasida 28-may kuni elektr tarmog‘idan uzib qo‘yilgan iste’molchilarning katta navbati yuzaga kelgani haqida xabar berilgan edi. “Hududiy elektr tarmoqlari” kompaniyasi mazkur navbatning yuzaga kelishiga izoh berdi.

Qayd etilishicha, mamlakatdagi karantin davrida aholiga yengillik yaratish maqsadida elektr energiyasidan qarzdor iste’molchilar tarmoqdan vaqtincha ajratilmasligi ma’lum qilingan.

Kompaniya tomonidan ma’lum qilinishicha, so‘nggi kunlarda karantin choralari yumshatilganligi sababli foydalanilgan elektr energiyasidan vujudga kelgan qarzdorliklarning ortishiga yo‘l qo‘ymaslik maqsadida qarzdor iste’molchilar tarmoqdan ajratilmoqda.

“Shu o‘rinda foydalanilgan elektr energiyasi uchun to‘lovlarni tuman elektr ta’minoti korxonalariga tashrif buyurmasdan, mamlakatimizda mavjud barcha to‘lov tizimlari (U-Pay, Click, Payme, Paynet va boshqalar) hamda banklarning mobil ilovalari orqali uydan chiqmasdan turib ham amalga oshirishingiz mumkinligini yana bir bor eslatib o‘tamiz”, — deyiladi kompaniya xabarida.

Ta’kidlanishicha, ayni vaqtda Mirzo Ulug‘bek elektr ta’minoti korxonasidagi vaziyat iste’molchilar o‘rtasida olib borilgan tushuntirish ishlari natijasida to‘liq bartaraf etilgan.

Shuningdek, kompaniya iste’molchilardan ishlatilgan elektr energiyasi uchun to‘lovlarni o‘z vaqtida amalga oshirilishini so‘ragan.