Тошкент шаҳрининг Мирзо Улуғбек туманидаги электр тармоқлари корхонасида 28 май куни электр тармоғидан узиб қўйилган истеъмолчиларнинг катта навбати юзага келгани ҳақида хабар берилган эди. «Ҳудудий электр тармоқлари» компанияси мазкур навбатнинг юзага келишига изоҳ берди.
Қайд этилишича, мамлакатдаги карантин даврида аҳолига енгиллик яратиш мақсадида электр энергиясидан қарздор истеъмолчилар тармоқдан вақтинча ажратилмаслиги маълум қилинган.
Компания томонидан маълум қилинишича, сўнгги кунларда карантин чоралари юмшатилганлиги сабабли фойдаланилган электр энергиясидан вужудга келган қарздорликларнинг ортишига йўл қўймаслик мақсадида қарздор истеъмолчилар тармоқдан ажратилмоқда.
«Шу ўринда фойдаланилган электр энергияси учун тўловларни туман электр таъминоти корхоналарига ташриф буюрмасдан, мамлакатимизда мавжуд барча тўлов тизимлари (U-Pay, Click, Payme, Paynet ва бошқалар) ҳамда банкларнинг мобил иловалари орқали уйдан чиқмасдан туриб ҳам амалга оширишингиз мумкинлигини яна бир бор эслатиб ўтамиз», — дейилади компания хабарида.
Таъкидланишича, айни вақтда Мирзо Улуғбек электр таъминоти корхонасидаги вазият истеъмолчилар ўртасида олиб борилган тушунтириш ишлари натижасида тўлиқ бартараф этилган.
Шунингдек, компания истеъмолчилардан ишлатилган электр энергияси учун тўловларни ўз вақтида амалга оширилишини сўраган.
Изоҳ (0)