Aholi orasida “Propiska yaqinda yana yopilarkan, ochilgani ma’lum muddat amal qilinadigan aksiya ekan” mazmunidagi xabarlar tarqaldi. Adliya vazirligi ana shu xabarlarga munosabat bildirdi.
Ta’kidlanishicha, Prezident farmoni bilan 2020-yil 1-apreldan boshlab Toshkent shahri va Toshkent viloyatida ko‘chmas mulkni olishda O‘zbekiston Respublikasi fuqarolari uchun ushbu hududlarda doimiy propiskaga ega bo‘lish talab qilinmasligi belgilangan.
Shunga ko‘ra, Toshkent shahri va Toshkent viloyatidan ko‘chmas mulk sotib olish uchun ushbu hududlarda doimiy yashash joyi bo‘yicha ro‘yxatga olinganligi sharti butunlay bekor bo‘lgan.
Shuningdek, 2020-yil 21-maydan Toshkent shahri va Toshkent viloyatida birlamchi bozordan yangi qurilgan uy-joy sotib olishda shartnoma summasining 5 foizi miqdorida davlat boji to‘lash tartibi bekor bo‘ldi.
Vazirlikning qayd etishicha, Toshkent shahrida propiska yopilishi yoki ochilishi masalasiga ko‘chmas mulk oldi-sotdi shartnomalarini rasmiylashtirishning hech qanday aloqasi yo‘q.
Ma’lum qilinishicha, bugungi kunda respublika hududida 818 nafar notarius faoliyat ko‘rsatayotgan bo‘lib, Toshkent shahri yoki Toshkent viloyatidagi ko‘chmas mulk oldi-sotdi shartnomalarini rasmiylashtirish uchun fuqarolar istalgan notariusga murojaat qilishi mumkin. “Faqatgina Toshkent shahridagi notariuslar Toshkent shahridagi ko‘chmas mulk oldi-sotdi shartnomalarini rasmiylashtirishi mumkin, degan fikrdan yiroq bo‘lishi lozim”, — deyiladi xabarda.
Eslatib o‘tamiz, 2020-yil 21-aprelda Shavkat Mirziyoyev Toshkent shahri va viloyatiga doimiy propiska qilishni soddalashtirish haqidagi farmonni imzolagan. 29-aprelda esa Qonunchilik palatasi deputatlari propiska tizimini isloh qilish to‘g‘risidagi qonunni ma’qullagan, 12-may kuni senatorlar propiska tizimiga kiritiladigan o‘zgarishlarni ma’qullagan. Shavkat Mirziyoyev mazkur qonunni 13-may kuni imzoladi.
Shuningdek, Prezident tomonidan 20-mayda imzolangan “‘Davlat boji to‘g‘risida’gi qonunga o‘zgartirish va qo‘shimchalar kiritish haqida”gi qonunga muvofiq, O‘zbekistonda doimiy yashovchi va respublikaning boshqa mintaqalarida doimiy propiskaga ega bo‘lgan O‘zbekiston fuqarolari tomonidan Toshkent shahri va Toshkent viloyatida yangi qurilgan ko‘chmas mulk sotib olinganda mol-mulkning oldi-sotdi shartnomalarini tasdiqlaganlik uchun shartnoma summasining 5 foizi miqdordagi davlat bojining alohida stavkasi bekor qilindi.
Vazirlar Mahkamasining “O‘zbekiston Respublikasida doimiy va vaqtincha propiska qilish tartibini yanada soddalashtirish chora-tadbirlari to‘g‘risida”gi qaroriga 2020-yil 22-may kuni o‘zgartirish va qo‘shimchalar kiritildi. Qarorga ko‘ra, propiska qilish tartibiga oid amaldagi nizom 2020-yil 1-sentabrga qadar amal qiladi. Hukumatning mazkur qarori bilan O‘zbekiston fuqarolarini Toshkent shahri va Toshkent viloyatida doimiy yashash va vaqtincha turgan joyi bo‘yicha ro‘yxatga olish tartibi to‘g‘risida nizom tasdiqlandi. Yangi nizom 2020-yil 1-sentabrdan kuchga kiradi.
Izoh (0)