Innovatsion rivojlanish vazirligi Behruz Hamzayevning “Vazirlik tashkil etilishi mening g‘oyam” degan iddaolariga munosabat bildirdi.
Qayd etilishicha, 26-may kuni bloger Kirill Altmanning Behruz Hamzayevdan olgan intervyusi Youtube ijtimoiy tarmog‘iga “Vazirlikni ochish — oson, O‘zbekistonni innovatsion mamlakat qilish — qiyin” sarlavhasi bilan joylashtirildi.
Mazkur intervyuda Behruz Hamzayev World Influencers Network asoschisi, “Ziyo Forum” rivojlanish va ta’lim jamg‘armasi direktori o‘rinbosari, Innovatsion rivojlanish vazirligi tuzilishining tashabbuskori hamda Turizmni rivojlantirish davlat qo‘mitasi raisining sobiq maslahatchisi, O‘zbekistonda amalga oshirilgan ko‘plab loyihalar, konsepsiyalar, strategiyalar va qonunlarning muallifi sifatida tanishtirilgan.
Suhbat davomida Behruz Hamzayev “Innovatsion rivojlanish vazirligining g‘oyasi mendan chiqqan, ular vazirlik nomini ham noto‘g‘ri qo‘ygan” deb fikr bildirgan.
Vazirlik matbuot xizmatining ta’kidlashicha, Innovatsion rivojlanish vazirligi Prezident tashabbusi bilan 2017-yilning noyabr oyida tashkil etilgan. Bunga bag‘ishlangan farmon va qarorlarni yozish ishlarida uning ishtiroki haqida hech qanday rasmiy ma’lumotlar ham yo‘q.
“To‘g‘ri, iqtidorli yosh mutaxassis tomonidan bloger Kirill Altmanga ko‘rsatilgan ‘O‘zbekiston Respublikasining kelajak, novatorlik va hamkorlik vazirligi’ deb nomlangan broshyurasi uch yil avval mas’ul xodimlarga taqdim etilgan va uning bu g‘oyasini kimdir qo‘llab-quvvatlagan ham bo‘lishi mumkin. Lekin bu uning “Innovatsion rivojlanish vazirligini men tashkil etganman” deyishi uchun asos bo‘la olmaydi”, — deyiladi rasmiy munosabatda.
Bundan tashqari, Behruz Hamzayev Innovatsion rivojlanish vazirligida rasman faoliyat yuritmagani, uning akasi Behzod Hamzayev boshqarma boshlig‘i lavozimida ishlagan davrda uning oldida yurgani ta’kidlangan.
“Behruz Hamzayevning vazirlikni tashkil etilishi bo‘yicha hujjatlarni tayyorlash uchun 50 ming dollar sarflagani haqidagi gapi esa O‘zbekiston davlat organlari faoliyati bilan ozroq bo‘lsa-da tanish bo‘lgan har qanday kishi uchun ham kulgili, ham mantiqsiz iddaodir”, — deyiladi vazirlik munosabatida.
Intervyuda Behruz Hamzayev Innovatsion rivojlanish vazirligi tuzilganidan beri biror ish qilmagani haqida ham gapirgan. Vazirlik bu gaplarining o‘rinsiz va asossiz ekanini tasdiqlovchi ma’lumotlar keltirgan.
Izoh (0)