Andijon viloyatida yashovchi ikki nafar yuk mashinasi haydovchisida koronavirus aniqlangani sababli qarib 100 kishi karantinga olingan. Bu haqda Sog‘liqni saqlash vazirligi xabar berdi.
Ma’lum qilinishicha, joriy yilning 22-may kuni Baliqchi tumanida yashovchi 50 yoshli R.R. Izboskan tumanida yashovchi sherigi 32 yoshli B.Q. bilan birgalikda xalqaro yuk tashish avtomashinasida Rossiyadan Toshkent viloyati Qibray tumani hududidagi chegara-nazorat postiga yetib kelgan. Shu kunning o‘zida o‘rnatilgan tartib bo‘yicha postdagi Sanitariya-epidemiologiya osoyishtaligi markazi xodimlari tomonidan har ikki haydovchidan koronavirus infeksiyasiga tekshiruv uchun namuna olingan. Ertasiga, 23-may kuni, B.Q.da gumon natija qayd etilganligi sababli takroran tahlil topshirgan, R.R.da esa kasallik aniqlanmagan.
Lekin haydovchilar belgilangan sanitariya qoidalariga rioya qilmasdan, chegara-nazorat posti avtoturargohidan uyiga chiqib ketgan. Shundan so‘ng huquqni muhofaza qiluvchi organ vakillari bilan o‘tkazilgan tezkor qidiruv va epidemiologik surishtiruv natijasida har ikki haydovchi ham o‘z uyidan topilgan.
Shu orada dastlab tahlil natijalari gumon qilingan B.Q.da ham, u bilan doimiy muloqotda bo‘lgan ikkinchi haydovchi R.R.da ham koronavirus infeksiyasi tasdiqlangan.
Epidemiologik surushtiruv natijasida Izboskan va Baliqchi tumanida R.R. va B.Q. bilan muloqotda bo‘lgan 100 nafarga yaqin fuqaro 14 kunlik tibbiy kuzatuvga olingan.
Ta’kidlanishicha, haydovchilarning e’tiborsizligi va sanitariya qoidalariga rioya qilmasligi ularning oila a’zolari, yaqinlari, qo‘shnilari va boshqa ko‘plab insonlarning karantinga olinishiga sabab bo‘lgan.
Avvalroq Izboskanda 23-may kuni bir kishida koronavirus aniqlangani ma’lum qilingandi. Shunga qaramasdan, 25-may kuni tumanda ommaviy tadbir o‘tkazilgan. Tuman Sanitariya-epidemiologiya osoyishtaligi markazi bemor bilan muloqotda bo‘lgan 51 kishi karantinga olinganini ma’lum qilgan. Ularning orasida oila a’zolari ham bor. Shu bilan birga, bemor bilan aloqada bo‘lgan 26 kishidan ham virusologik tahlil uchun namuna olingan.
Izoh (0)