Ramzan Qodirov koronavirusga chalingani haqidagi xabarlardan keyin birinchi marta omma oldida ko‘rinish berdi
Checheniston rahbari Ramzan Qodirov koronavirusga chalinib, Moskvada kasalxonalardan biriga yotqizilgani haqidagi xabarlardan keyin birinchi marta omma oldida ko‘rinish berdi. Qodirovning Telegram’dagi kanaliga uning o‘zi ishtirok etgan tezkor shtabning yig‘ilishi surati joylandi.
“Tezkor shtabning bayram dam olish kunlaridan keyingi birinchi yig‘ilishida mas’ul shaxslarning hisobotlarini eshitdim”, — deb yozgan Ramzan Qodirov o‘z kanalida. Suratlarda uning tezkor shtab vakillari bilan stol atrofida o‘tirgani aks etgan.
Qodirovning so‘zlariga ko‘ra, Chechenistonda pandemiya fonida kasalxonalardagi va iqtisodiyot sohalaridagi vaziyat barqaror. “Biz allaqachon koronavirus bilan kurash haqida keraklicha foydali bilim oldik”, — deya ta’kidlagan Qodirov.
Ramzan Qodirovning koronavirusga chalingani va Moskvadagi kasalxonaga yotqizilgani haqidagi xabarlar 21-may kuni paydo bo‘ldi. Keyinroq shifokorlar Ramzan Qodirovning ahvoli haqida ma’lumot bergani xabar qilindi.
