O‘zbekiston Professional futbol ligasi (PFL) bosh direktori Davron Shoqurbonov vazifasini tark etgani tasdiqlandi.
PFL xabariga ko‘ra, Shoqurbonov 25-may kuni o‘z arizasiga ko‘ra, vazifasidan ozod etilgan. “Daryo” bu haqida 22-may kuni ma’lum qilib, uning o‘rniga ikki nomzod borligi haqida yozgandi.
Uning o‘rnini Diyor Imomxo‘jayev egalladi. Imomxo‘jayev nomzodi O‘zbekiston futbol assotsiatsiyasi prezidenti Abdusalom Azizov taqdimiga asosan PFL Ijroiya qo‘mitasi tomonidan tasdiqlangan. Endi u PFL bosh direktori vazifasini bajaruvchi sifatida faoliyat olib boradi.
Qayd etish joiz, Diyor Imomxo‘jayev hozirga qadar PFL direktori o‘rinbosari sifatida ishlab kelayotgandi.
Professional futbol ligasi — O‘zbekistonda futbol musobaqalarini o‘tkazish bilan shug‘ullanadi. PFL 2008-yildan tashkil etilgan. 2009-yildan o‘z faoliyatini boshlagan. Superliga, Pro-Liga, O‘zbekiston Kubogi va Liga Kubogi kabi yirik musobaqalarni o‘tkazish mazkur tashkilot tasarrufiga kiradi. Tashkilotni 2009-yildan 2017-yilgacha sobiq futbolchi Farhod Magomedov boshqargan. Omon G‘ofurov esa ikki yil davomida PFLga rahbarlik qilgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)