O‘zbekiston futbol assotsiatsiyasi (O‘FA) futbol bo‘yicha Superliga va O‘zbekiston Kubogi bahslari translyatsiya huquqini sotish bo‘yicha tender e’lon qildi.
“O‘zbekiston futbol assotsiatsiyasi (O‘FA) Professional futbol ligasi (PFL) bayrog‘i ostida o‘tadigan uchrashuvlarning real vaqt rejimi (onlayn shakl) dagi audiovizual huquqlarini olish uchun translyator va telekommunikatsion kompaniyalar, shuningdek, sport huquqi sohasidagi agentliklar o‘rtasida tender e’lon qiladi. O‘FA va PFL tashkilotlari FIFA hamda OFK normalari asosida o‘tkaziladigan musobaqalar, uchrashuvlar va boshqa tadbirlarning tashkilotchisi sifatida audiovizual huquqlariga bevosita egalik qiladi. Tenderda ishtirok etish niyatida bo‘lgan kompaniyalar 2020-yil 5-iyun kuni (soat 18:00) ga qadar rasmiy so‘rov yuborishlari talab etiladi”, — deyiladi O‘FA xabarida.
O‘FA xabariga tayaniladigan bo‘linsa, Superliga, quyi ligalar ham kubok bahslari translyatsiya huquqi ushbu musobaqalarni o‘tkazadigan Professional futbol ligasining o‘zigagina tegishli emas. O‘FA bu huquq ham tashkilotning o‘ziga va PFLga tegishli ekanligini ta’kidlagan.
Qayd etish joiz, Superliga va kubok uchrashuvlarini MTRK tarkibidagi “Sport” telekanali O‘zbekiston hududida translyatsiya qiladi. “Daryo”ga ma’lum bo‘lishicha, PFL va “Sport” telekanali o‘rtasida ikki yillik kelishuv amalda va u bekor qilinmagan. “Sport” telekanali shu kelishuv asosida translyatsiyani bepul asosda qo‘lga kiritgan.
Shu boisdan “Daryo” muxbiri masalaga aniqlik kiritish maqsadida O‘FA matbuot va media departamentiga direktori Davron Fayziyev bilan bog‘landi. “Hozircha translyatsiya huquqini sotish bo‘yicha tender faqat internet resurslari uchun. Keyinchalik televizion huquq ham sotilishi mumkin”, — deya javob berdi Fayziyev.
Bu ma’lumotlarni “Sport” telekanali direktori Zohid Karimov ham tasdiqladi. U tender faqat internet teletransliyatsiyasi uchun ekanligini ta’kidladi. Shuningdek, Karimov telekanalning PFL bayrog‘i ostidagi musobaqalarni yoritish huquqini bepul asosda qo‘lga kiritgani haqida ham izoh berib o‘tdi.
“Telekanalimiz Superliga bahslarini juda katta resurs sarflab yoritadi. PFL esa mazkur xarajatlarni yarmini qoplab beradi. Kelishuv vaqtida shunday bo‘lgan. Tashkilot barcha o‘yinlarni ko‘rsatishni so‘ragan. Buning uchun juda katta xarajat qilinadi. Jumladan, safar, texnika (KTS, aloqachilarga to‘lanadigan pullar) xarajatlari uchun. Mamlakatda esa parallel o‘tadigan boshqa sport musobaqalari ham bor. Shular haqida aytilgandan so‘ng PFL ma’lum miqdorda mablag‘ berishga rozilik bergan. Ammo tashkilot bergan mablag‘ xarajatning 3/1 qismini ham qoplamaydi. Telekanalimiz esa 50 foiz xarajatlarini budjetdan tashqari mablag‘lar, ya’ni reklamalardan tushadigan mablag‘lar evaziga qoplaydi. Futbolimizga esa qanday reklamalar kelayotganini tasavvur qilish qiyin emas”, — deydi Zohid Karimov.
Ma’lumot uchun, O‘zbekiston Superligasi koronavirus pandemiyasi sabab 3-turdan so‘ng to‘xtab qolgan. O‘yinlarning qachon qaytadan boshlanishi esa hozircha noma’lum.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)