Andijon shahrining “Oqrovot” mahallasi, 1-tor Shahidtepa ko‘chasida yashovchi aholining elektr toki bilan bog‘liq muammosi hal etildi. Bu haqda “Daryo”ga “Andijon hududiy elektr tarmoqlari korxonasi” AJ axborot xizmati ma’lum qildi.
Joriy yil 8-may kuni “Daryo”da e’lon qilingan maqolada Andijon shahrining “Oqrovot” mahallasi, 1-tor Shahidtepa ko‘chasida yashovchi fuqarolarning elektr ta’minotidagi muammolari tilga olingandi.
Ta’kidlanishicha, mazkur maqoladan so‘ng “Andijon hududiy elektr tarmoqlari korxonasi” AJ rahbariyati hamda Andijon shahar elektr ta’minoti korxonasi “Bobur” bo‘limi tomonidan tegishli choralar ko‘rilgan.
Ma’lum bo‘lishicha, “Oqrovot” mahallasi 1-tor Shahidtepa ko‘chasida yashovchi fuqarolar Andijon shahar “Bobur” elektr ta’minoti korxonasi tasarrufidagi “Sakina” elektr uzatish tarmog‘iga ulangan 828-sonli quvvati 160 kVA bo‘lgan kuch transformator orqali elektr energiya bilan ta’minlangan. Hududda tabiiy gaz yo‘qligi sabab elektr energiyaga bo‘lgan talab yuqoriligi inobatga olinib, qo‘shimcha, quvvati 160 kVA bo‘lgan kuch transformator punkti olib kelingan.
Aytilishicha, aholining elektr toki bilan bog‘liq muammosini bartaraf etish ishlari avvalroq boshlangan. Biroq karantin sabab to‘xtab qolgan ish ayni kunda davom ettirilgan.
“‘Bobur’ elektr ta’minoti korxonasi mas’ul xodimlari tomonidan olib borilgan sa’y-harakatlar natijasida aholini sifatli va uzluksiz elektr energiya bilan ta’minlash maqsadida transformator punktini ishga tushirish uchun kerakli materiallar olib borildi. Beton tayanchlar o‘rnatildi, havo tarmog‘i uchun kerakli materiallar traverslar izolyatorlar qotirildi. Natijada qo‘shimcha kuch transformator punkti ishga tushirildi. Ushbu holat 100 dan ortiq aholi xonadonlarining elektr ta’minotini yaxshilashga sabab bo‘ldi. Mahalla fuqarolari elektr ta’minoti xodimlari tomonidan olib borilgan ishlardan ko‘tarinki kayfiyatdaligini ma’lum qildi”, — deyiladi korxona axborot xizmati xabarida.
Izoh (0)