Андижон шаҳрининг «Оқровот» маҳалласи, 1-тор Шаҳидтепа кўчасида яшовчи аҳолининг электр токи билан боғлиқ муаммоси ҳал этилди. Бу ҳақда «Дарё»га «Андижон ҳудудий электр тармоқлари корхонаси» АЖ ахборот хизмати маълум қилди.
Жорий йил 8 май куни «Дарё»да эълон қилинган мақолада Андижон шаҳрининг «Оқровот» маҳалласи, 1-тор Шаҳидтепа кўчасида яшовчи фуқароларнинг электр таъминотидаги муаммолари тилга олинганди.
Таъкидланишича, мазкур мақоладан сўнг «Андижон ҳудудий электр тармоқлари корхонаси» АЖ раҳбарияти ҳамда Андижон шаҳар электр таъминоти корхонаси «Бобур» бўлими томонидан тегишли чоралар кўрилган.
Маълум бўлишича, «Оқровот» маҳалласи 1-тор Шаҳидтепа кўчасида яшовчи фуқаролар Андижон шаҳар «Бобур» электр таъминоти корхонаси тасарруфидаги «Сакина» электр узатиш тармоғига уланган 828-сонли қуввати 160 кВА бўлган куч трансформатор орқали электр энергия билан таъминланган. Ҳудудда табиий газ йўқлиги сабаб электр энергияга бўлган талаб юқорилиги инобатга олиниб, қўшимча, қуввати 160 кВА бўлган куч трансформатор пункти олиб келинган.
Айтилишича, аҳолининг электр токи билан боғлиқ муаммосини бартараф этиш ишлари аввалроқ бошланган. Бироқ карантин сабаб тўхтаб қолган иш айни кунда давом эттирилган.
«‘Бобур’ электр таъминоти корхонаси масъул ходимлари томонидан олиб борилган саъй-ҳаракатлар натижасида аҳолини сифатли ва узлуксиз электр энергия билан таъминлаш мақсадида трансформатор пунктини ишга тушириш учун керакли материаллар олиб борилди. Бетон таянчлар ўрнатилди, ҳаво тармоғи учун керакли материаллар траверслар изоляторлар қотирилди. Натижада қўшимча куч трансформатор пункти ишга туширилди. Ушбу ҳолат 100 дан ортиқ аҳоли хонадонларининг электр таъминотини яхшилашга сабаб бўлди. Маҳалла фуқаролари электр таъминоти ходимлари томонидан олиб борилган ишлардан кўтаринки кайфиятдалигини маълум қилди», — дейилади корхона ахборот хизмати хабарида.
Изоҳ (0)