Андижонда фуқаронинг автомашинасини жарима майдончасидан чиқариб бериш эвазига пора олишга уринган вилоят транспорт бошқармаси бўлим бошлиғи қўлга олинди. Бу ҳақда Бош прокуратура «Дарё»га маълум қилди.
Маълумотларга кўра, Бош прокуратура ҳузуридаги департаментнинг Шаҳрихон туман бўлими томонидан фуқаро К.К.нинг мурожаати бўйича ДХХ ва ИИБ ходимлари билан ҳамкорликда тезкор тадбир ўтказилган.
Таъкидланишича, Андижон вилоят транспорт бошқармаси бўлими бошлиғи М.А. фуқаро К.К.нинг махсус рухсатномасиз аҳолига пуллик транспорт хизмати кўрсатиб келаётганлиги ҳолати бўйича жарима майдончасига қўйилган Nexia русумли автомашинасини жарима майдончасидан чиқариб беришни ваъда қилган. Мазкур ҳолат юзасидан маъмурий баённома расмийлаштирмаслик эвазига М.А. бир миллион сўмни фуқаро М.Ш. орқали пора тариқасида олган вақтида ашёвий далил билан ушланган.
Мазкур ҳолат юзасидан Жиноят кодексининг тегишли моддаси билан жиноят иши қўзғатилиб, тергов ҳаракатлари ўтказилмоқда.
Апрель ойининг охирларида Андижонда Агроинспекция туман бўлими бошлиғи 10 минг доллар пора билан қўлга тушгани ҳақида хабар берилганди.
Изоҳ (0)