Tramp go‘sht kombinatlarining mavqeyini mudofaa korxonalariga tenglashtirib qo‘ydi

AQSh prezidenti Donald Tramp go‘sht ishlab chiqarish va qayta ishlash zavodlari mavqeyini mudofaa korxonalariga tenglashtiruvchi qarorni imzolab, ularning COVID-19 pandemiyasi sharoitida ham ishlashini ta’minlovchi imkoniyatni taqdim etdi. Bu haqda Oq uyga tayanib, “RIA Novosti” xabar berdi.

Avvalroq sohaning yirik vakillari koronavirus pandemiyasi sabab yopilishga majbur bo‘layotgani, bu esa AQShda go‘sht taqchilligiga olib kelishini ma’lum qilgandi.

“Mol go‘shti, qo‘y go‘shti, cho‘chqa va parranda go‘shtlarini yetkazib beruvchilar bir bo‘lib ishlab chiqarishni davom ettirishi va amerikaliklarni oqsillar bilan ta’minlash bo‘yicha buyurtmalarni bajarishi muhim ahamiyatga ega”, — deyiladi qaror matnida.

So‘nggi vaqtlarda AQShda mahalliy hukumat bosimi ostida cho‘chqa go‘shtini yetkazib beruvchi yetakchi kompaniyalardan biri Smithfield Foods Illinoysdagi fabrikasini yopishga majbur bo‘ldi. Hormel Foods esa Minnesotadagi kurka go‘shtini ishlab chiqaruvchi ikkita zavodini yopdi. Indianada esa cho‘chqalarning yirik kushxonasi yopildi.

AQShda go‘shtning ulgurji narxi ko‘tarilmoqda. Mol go‘shti va cho‘chqa go‘shtining narxi rekord ko‘rsatkichlarni qayd etgan, xususan, cho‘chqa go‘shti bir hafta davomida qariyb 30 foizga qimmatlashdi.

So‘nggi ma’lumotlarga ko‘ra, AQShda COVID-19 koronavirusiga chalinganlarning umumiy soni bir million nafardan oshib ketgan, vafot etganlar soni esa 210 ming nafarni tashkil qilmoqda.