Ta’lim sifatini nazorat qilish inspeksiyasi O‘zbekistonda o‘quv markazlarining faoliyati qachon tiklanishiga aniqlik kiritdi

Vazirlar Mahkamasi huzuridagi Ta’lim sifatini nazorat qilish davlat inspeksiyasi mamlakatda o‘quv markazlarining faoliyati qachon tiklanishi yuzasidan ma’lumot berdi.

Inspeksiya tomonidan ma’lum qilinishicha, mamlakatda karantin cheklovlarining yumshatilishi o‘quv markazlari faoliyatini davom ettirishiga asos bo‘lmaydi.

Ta’kidlanishicha, Respublika maxsus komissiyasining davlat va nodavlat ta’lim tashkilotlarida ta’lim jarayonlarini davom ettirish bo‘yicha tegishli qarori qabul qilingandan so‘ng o‘quv markazlarida ta’lim jarayonlarini tashkil etish mumkin bo‘ladi.

Karantin davrida davlat ta’lim muassasalarida onlayn va masofaviy darslar tashkil etilganligini inobatga olib, inspeksiya o‘quv markazlariga o‘z kurs qatnovchilariga masofaviy shaklda ta’lim berib borishni tavsiya qilgan.

Shu bilan birga, inspeksiya uy sharoitida 3-4 nafar abituriyentga dars o‘tish ham karantin qoidalarini buzish hisoblanishini ma’lum qilgan.