O‘zbekiston Prezidenti Shavkat Mirziyoyev 30-aprel, payshanba kuni, 2019/2020-o‘quv yilini sifatli yakunlash, bitiruv va kirish imtihonlarini tashkil etish masalalari muhokamasiga bag‘ishlangan yig‘ilish o‘tkazdi. Bu haqda Prezident matbuot xizmati xabar berdi.
Mavzuga doir: Koronavirus sababli O‘zbekistonda OTMlardagi bitiruv imtihonlari onlayn o‘tkaziladi, kirish imtihonlari soddalashtiriladi
Respublikada Prezident maktablari soni 4 taga yetdi, 9 ta ijod maktabi o‘z faoliyatini olib bormoqda. 2020-yilda yana 5 ta Prezident maktabi va 2 ta ijod maktabini foydalanishga topshirish rejalashtirilgan. Ularni o‘z muddatida qurish ishlarini tizimli tashkil etish bo‘yicha tegishli topshiriqlar berildi.
“Pandemiyani sabab qilib ta’lim tizimini takomillashtirish bo‘yicha ishlarni kechiktirishga mutlaqo haqimiz yo‘q”, — dedi Prezident.
Vaziyatga qarab, o‘quv yuklamalarini va dasturlarini qayta ko‘rib chiqish, oliy o‘quv yurtlarida amaliy ko‘nikmalarni rivojlantirishga e’tiborni kuchaytirish lozimligi belgilandi.
Oliy va o‘rta maxsus ta’lim vazirligi hamda Vazirlar Mahkamasi huzuridagi Ta’lim sifatini nazorat qilish davlat inspeksiyasiga oliy ta’lim muassasalariga reja va dasturlarni ish beruvchilar talabidan kelib chiqib, mustaqil tasdiqlash vakolatini berish bo‘yicha vazifalar yuklatildi. Dasturlarning belgilangan talablarga mosligini nazorat qilish mexanizmi ham ishlab chiqiladi.
Zerikarli ma’ruzalar o‘qish, konspektlar yozdirish kabi o‘zini oqlamagan usullardan voz kechib, ta’lim metodikasini rivojlantirish va pedagoglar saviyasini oshirish g‘oyat muhim masalaligi ta’kidlandi.
Shu munosabat bilan, Xalq ta’limi va Oliy va o‘rta maxsus ta’lim vazirliklariga bosqichma-bosqich masofaviy shaklda pedagoglar malakasini oshirish, dars mashg‘ulotlarini masofadan kuzatish, baholashda inson omilini kamaytirish bo‘yicha ishlarni amalga oshirish topshirig‘i yuklatildi.
Shuningdek, mazkur yig‘ilishda OTMlardagi bitiruv imtihonlari 2020-yildan onlayn o‘tkazilishi va kirish imtihonlari soddalashtirilishi ma’lum qilindi.
Eslatib o‘tamiz, O‘zbekiston maktablarida 2019/2020-o‘quv yili onlayn tarzda yakunlanadi. Karantin vaqtida teledarslar o‘tayotgan o‘qituvchilar mazkur darslarni Toshkentdagi Prezident maktabida tayyorlamoqda.
Izoh (0)