Farg‘onada firibgarlik yo‘li bilan un xarid qilib, aholiga qimmat sotayotgan korxonaga nisbatan jinoyat ishi qo‘zg‘atildi

Bosh prokuratura huzuridagi departamentning Farg‘ona viloyati, Bag‘dod tumani bo‘limi tomonidan hududda unni aholiga kafolatli tarzda va arzon narxda yetkazib berishga ta’sir ko‘rsatayotgan shaxslar to‘g‘risida olingan ma’lumotlar tezkor guruh tomonidan zudlik bilan o‘rganildi, deb xabar berdi Bosh prokuratura matbuot xizmati.

O‘tkazilgan tergovga qadar tekshiruvda aniqlanishicha, oilaviy korxona va ko‘p tarmoqli firma rahbari I.M. Tovar xomashyo birjasi orqali un sotib olishda shubha uyg‘onishining oldini olish hamda narxlarni oshirib, boshqa xaridorlarni savdodan chiqarish maqsadida korxona ishchi va xizmatchilari hamda o‘zining qarindoshlari nomiga 10 ta oilaviy korxona, 5 ta yakka tartibdagi tadbirkorlik subyektini tashkil qilgan.

Tashkil etilgan nominal korxonalar va yakka tartibdagi tadbirkorlik subyektlarini I.M. o‘zi amalda yuritib, ushbu korxona rahbarlarining xabardor qilmasdan, Tovar-xomashyo birjasi orqali don mahsulotlari korxonalaridan un sotib olish uchun brokerlik xizmati ko‘rsatish to‘g‘risidagi shartnomalarda imzolarni soxtalashtirib taqdim etgan.

So‘ngra I.M. brokerlar orqali sotib olingan unlarni olib chiqish uchun ishonchnoma hamda boshqa hujjatlardagi imzolarni soxtalashtirib, 2019-yilning oktabr oyidan 2020-yilning 15-apreliga qadar jami 18,3 milliard so‘mlik 7 800 tonna unni olib, narxlarni sun’iy ravishda oshirgan holda aholiga sotayotganligi aniqlangan.

Mazkur holatlar yuzasidan I.M.ga nisbatan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari o‘tkazilmoqda. Jinoyat ishi viloyat prokuraturasi tomonidan alohida nazoratga olingan.